Grønlandsbanken 50-iliivoq
Oqartoqartarneratuut inuuissiortoq naalassimammat silagissuuvoq.
Helle Mark inuuissiortumik nalunnginnilluarpoq. Inuuissiortorlu ima ilisaritippaa.
- Tatiginartoq, nukittooq, taavalu tamatigoortoq, Grønlandsbankenimi sullissivimmi aqutsisoq Helle Mark taama oqarpoq.
Ullumi inuuissiorluni 50-iliisoq tassaavoq Grønlandsbanken.
Helle Mark ukiuni 27-ni bankimi sulivoq, taamaattumillu Grønlandsbanken Hellep inuuneranut sunniuteqarluinnarluni. Imami sunniuteqartigaaq allat suleqatimi ilai suleqataannartut taagorunnaarsimagamigit.
- Suleqatikka aamma ilaquttatullusooq isigilernikuullugit. Allaat immitsinnut taaguusersortarluta, soorlu aanaaqarpugut aataaqarpugut aamma ataaseq søster-mik taasarparput, Helle Mark oqarpoq.
AAMMA ATUARUK Grønlandsbankip naatsorsuutigissaarneq nuannaarutigigaa
Grønlandsbankenip ukiuni 50-ni atuussimanera illoqarfinni arfinilinni pingasunngormat malunnartinniarneqarmat kaffillertoqarlunilu aliikkutassaqartitsisoqarpoq. Taamaattumik Helle suleqatinilu ullup qanilliartornerani pikisimapput.
Banki Kalaallit Nunaannut pingaarutilik
Maannalu pisortaasup banki ukioq manna nalliuttorsiutigineqartoq nersualaanngitsuunngilaa.
- Siullermik sullitatsinnut isumaqartorujussuuvugut aamma Kalaallit Nunaat tamakkingajalluinnarlugu ulluinnarni attaveqarnerput isumaqarteqaarput, Grønlandsbankenip pisortaa Martin Kviesgaard taama oqarpoq.
Helle Mark persuarsioqataavoq, ukiunilu taamak amerlatigisuni sulereernermini tulluusimaarpoq.
- Tanngassimaarutigeqaara ingiaqatigisimagakku ukiorparpassuit aamma neriuppunga ukiorpassuit suli ingerlaqatigiissalluta, Helle Mark oqarpoq.
Grønlandsbanken isaasalerlugu ukioqqortusilaareeraluartoq, taamaattoq bankip soraarninngornissaa suli eqqarsaataanngikkallarpoq.
- Maanna ingerlalluaqigatta isumaqanngilanga banki soraarninngussasoq. Ukiorpassuit suli maaniinniartussaavugut, Martin Kviesgaard taama oqarpoq.
Grønlandsbankenimik pilersitsilluni Københavnimi Danske Bankers Fællesrepræsentationip initaani ulloq 26. maj 1967-mi ataatsimeersuarluni pilersinneqarpoq.