Aleqa Hammond: Nunatta Cataloniallu inissisimanerat assigeequteqarpoq

Cataloniap avissaarniartuisa siuttuata Carles Puigdemontip danskit, savalimmiormiut kalaallillu politikkerii Christiansborgimi ataatsimeeqatigai.

Tunngaviusumik inatsisit ataatsimiinnermi eqqartorneqartut ilagaat, soorlu killiligaanani oqaaseqarsinnaaneq aammalu tamat oqartussaaqataanerat. Aleqa Hammond, attaviitsuusoq oqarpoq. 
- Tamat oqartussaanerata qanoq nukittorsaqqinnissaanut iliuuseqarsinnaaneq oqaluuserineqarpoq, Aleqa Hammond oqarpoq. 

Politikerip Marni Argep Puigdemont ataatsimiigiaqqullugu qaaqquaa, Argep partiiata savalimmiormiut namminiilivinnissaat sorsuutigaa. 

Hammond isumaqataavoq

Cataloniamiut naalagaaffiit allat assigalugit Naalagaaffiittut anginerusutut aalajangiisinnaasariaqartoq, Arge isumaqarpoq. Taassuma Cataloniamiut inissisimanerat kalaallit Nunaannut assersuunneqarsinnaalluarneranut Aleqa Hammond isumaqataavoq.  

- Nunatsinni namminersorluta oqartussaaffeqarnitsinni assingusumik aaqqissuussaagamik Cataloniami, Aleqa Hammon oqarpoq. 

Ataatsimeeqatiginissaalu pingaaruteqartoq, Aleqa Hammond isumaqarpoq.

- Taama sakkortutigisumik illuatungilersorneqarneq qanorlu iliuuseqarfigineqartariaqarneranut politikkikkut inatsisitigut aamma tunngaviusumik inatsisitigut tusarlugu isumaqarpunga pissarsinartorujussuusoq tarrarsorfiginarlunilu, Hammon oqarpoq. 

Nunatsinnukarnissamut soqutiginnittoq

Puigdemont Folketingemi ataatsimeeqatigineqareermat, Aleqa Hammondip Kalaallit Nunaat pillugu oqaloqatigaa. 
- Ataatsimiinnerup naammassinnerani oqaloqatigilaarpara inuttut, Cataloniarmiut ittuat, soqutiginnippoq nunatsinnukarusulluni, nunatsinnilu aamma namminersorluni oqartussaanerup aaqqissugaanera taavalu aamma atugassarititaasut siunissami suut assigiinngitsut eqqartueqataaffigisinnaallutigit soqutiginnippoq.

Danskit naalakkersuisuutitaanni partiit aamma Socialdemokraatit ataatsimiinnermi peqataanngillat.  Taamaattorli Enhedslisten, SF aamma Alternativet ataatsimeeqataapput.  Aaja Chemnitz Larseni folketingemi allanik suliassaqaarnini pillugu ataatsimiinnermi peqataanngilaq.