Aaqqiissutissarsisut: Kalaallit Folketingimut siunnersuuteqarsinnaanngorput

Tamanna Folketingip Allaffeqarfiata KNR-imut paasissutissiissutigaat.

Folketingip nittartagaa borgerforslag.dk januaarimi atulersinneqarmat innuttaasut politikerinut siunnersuuteqarsinnaalerput siunnersuutaannullu tapersiisinnaalerlutik.

Innuttaasummi siunnersuutaat 50.000-iniit atsiorneqarpat aatsaat, partiit arlaata siunnersuutaasoq ullormut oqaluuserisassanngortissinnaavaat.

Nittartagarli atuliinnartorlu Nunatsinni Savalimmiunilu innuttaasut qarasaasiaq aqqutigalugu siunnersuusiorsinnaanngitsut tapersiisinnaanngitsulluunniit KNR-imit paasineqarpoq.

Matumani borgerforslag.dk-p danmarkimi qinersisartut qarasaasiakkut sunniuteqarniarpata NemID aqqutigalugu Danmarkimi partiit Folketingimut qinigassanngortinniarlutik atortagaat ajutoorfiuvoq.

AAMMA ATUARUK Borgerforslag.dk-p NemID atorlugu nunatsinnit iserfiginissaa ajornartorsiutigineqartoq

Atortorissaarummi atorneqartoq Nunatsinni Savalimmiunilu atorneqanngimmat.

Folketingilli IT-qarfiani sulisut isissutissaq allanngortippaat, taamaasillutik innuttaasut nunatsinneersut savalimmiuneersullu NemID atorlugu siunnersuusioqataasinnaalerput tapersersuisinnaalerlutillu.

AAMMA ATUARUK Siunnersuuteqarnissamut aaqqissuussinermi Kalaallit Nunaat ajornerusumik inissisimavoq