Borgerforslag.dk-p NemID atorlugu nunatsinnit iserfiginissaa ajornartorsiutigineqartoq
Innuttaasut Nunatsiniittut Folketingimut siunnersuummik nittartakkakkut "borgerforslag.dk"-kkut NemID artorlugu tapersiiniarsimagaluartut nittartakkamit itigartinneqartarsimagunarput.
Folketingip Allaffeqarfiata KNR-imut tamanna uppernarsarpaa.
Nittartagaq Borgerforslag.dk Folketingimit sapaatit akunnerata siuliani saqqummersinneqarpoq, danskisut innuttaasusillit Folketingimut qinersisinnaatitaasut Folketingimi oqallisigitikkusutaminnik tassuuna siunnersuuteqarsinnaapput siunnersuummulluunniit tapersiillutik.
AAMMA ATUARUK Aaqqissuussamut nutaamut ikippallaartugut
Siunnersuuteqarnissamullu siunnersuummulluunniit tapersiinissamut periaasissaq sukkanerpaaq tassaavoq NemID atorlugu digitalimik atsiorneq.
Periaaserli taanna innuttaasunit Nunatsinni najugaqartunit atorneqarsinnaagunanngilaq. NemID atorlugu nittartakkamut borgerforslag.dk-mut isertoqarsinnaavoq, digitalimilli atsiornissaq ajornarpoq.
- Ajoraluartumik teknikkikkut akornuteqarneranik pissuteqarpoq, aaqqiissuteqarfiginissaalu sulissutigileruttorparput, Folketingip Allaffeqarfia KNR-imut mailikkut taama paasissutissiivoq.
Ajornartorsiutaasoq Savalimmiuni innuttaasunut aamma atuunnersoq Folketingip IT-mut immikkoortortaqarfiata aamma misissuiffigileruttorpaa.
AAMMA ATUARUK Siunnersuuteqarnissamut aaqqissuussinermi Kalaallit Nunaat ajornerusumik inissisimavoq
Qinersisartunut atsiorneri digitaliusut akornusersuutaasut
Kukkunermut pissutaasoq Danmarkimi systemimi qinersisartut atsiornerinik partiit katersinermut atugaanni nassaassaasoq, Folketingip Allaffeqarfiata paasissutissiissutigaa.
Danmarkimi partiit Folketingimut qinigassanngortitsinissamut qinersisartut atsiornerinik internetikkut NemID atorlugu katersinissaannut aaqqissuussineq Danmarkimi nunami namminermi pissutsinut ministereqarfiup 2016-imi atulersippaa.
Aaqqissuussinerli taanna Nunatsinnut Savalimmiunullu atuutinngilaq, tamannalu borgerforslag.dk-p iserfiginissaanut akornusersuutaasorineqarpoq.
Innuttaasulli NemID-qanngitsut Folketingimut siunnersuuteqarlutillu siunnersuutigineqartumut tapersiisinnaapput. Tamanna Folketingimit immersugtassaq atorlugu pissaaq. Taannalu immersoriarlugu allakkatigut nalinginnaasukkut nassiunneqassaaq.
AAMMA ATUARUK Innuttaasut siunnersuutaat siulleq tapersersorneqarluartoq
Ajornartorsiutaasullu aaqqiissuteqarfiginissaata tungaanut Nunatsinni innuttaasut NemID-qartut aaqqiissutissaq taanna atortariaqassavaat.
- Kalaallit Nunaanni innuttaasut nittartakkap iluarsinissaanik utaqqerusunngikkunik immersugassat innuttaasunut digitalimik sullissinernik atuinngitsunut atugassiat aaqqiissuteqartoqarnissaata tungaanut atortariaqarpaat, Folketingip Allaffeqarfia taama allappoq.
Siunnersuutit ulluni 180-ini borgerforslag.dk-miitinneqassapput. Taamaammat allakkatigut nassiussat piffissaq eqqorlugu apuunnissaat ilimanarpoq.
