Professori: Siunnersuuteqarnissamut aaqqissuussinermi Kalaallit Nunaat ajornerusumik inissisimavoq
Atsiornerit 50.000-it katersornerisigut danskisut innuttaassusillit aaqqissuussineq nutaaq atorlugu Folketingimi siunnersuuteqarsinnaapput.
Nunatsinniilli siunnersuuteqassagaanni nunatta avataani ikiortissarsiortoqartariaqarpoq, Folketingimummi qinersinermi kingullermi 2015-imi pisumi nunatsinni qinersisinnaatitaasut 41.000-it missaannaaniipput. Savalimmiuni qinersisinnaatitaasut ukioq taanna 35.607-iupput.
Taamatullu aaqqissuussisoqarnera eqqarsaatigilluagaanngilaq, naalagaaffiit pillugit ilisimatusarnermi professori oqartussaaqataanermillu ilisimatusartoq Jørgen Elklit, Aarhusip Universitetianeersoq, taama isumaqarpoq.
- Siunnersuuteqartut Kalaallit Nunaat - aammalumi Savalimmiut - eqqarsaatigivallaarsimagunanngilaat, taamaaliorsimagunimmi allaanerusumik iliorsimassagaluarput, KNR-imut taama oqarpoq.
AAMMA ATUARUK Aaqqissuussamut nutaamut ikippallaartugut
Nunarput eqqarsaatigineqanngitsoq
Innuttaasut siunnersuuteqassagunik siunnersuummulluunniit tapersiissagunik digitalimik aaqqissuussaq NemID nittartakkami borgerforslag.dk-mi atortariaqarpaat.
Innuttaasut NemID-qanngitsut allakkatigut immersugassaq Folketingimeersoq atussavaat, taannalu anillatseriarlugu atsiorneqassaaq scanneriarlugulu Folketingimut mailikkut allakkatigulluunniit nassiunneqassalluni.
AAMMA ATUARUK Innuttaasut siunnersuutaat siulleq tapersersorneqarluartoq
Siunnersuummulli atsiornernik nittartakkatiguunngitsumik katersinissaq Nunatsinnut naleqqiullugu Danmarkimi ajornannginnerussaaq, Elklit taama isumaqarpoq.
Illoqarfiimmi imminnut ungasinnerat isorliunerusunilu internettimut attaveqarnerup pitsaavallaannginnera pissutigalugit nittartakkatiguunngitsumik atsiornernik katersinissaq ajornarnerussaaq.
- Aamma siunnersuutigineqartut najukkami pissutsinik tunngaveqarpallaannginnissaat siunertarineqarunarpoq. Nunalli immikkoortuini taakkunani (Danmarkimi, aaqq.) najugallit siunnersuutigineqartumut tapersiisinnaasut amerlapput. Taamaammat isumaqarpunga assigiinngissutaasoq annertusoq, Jørgen Elklit taama oqarpoq.
Tusagassiuutinit sammineqarnerat aalajangiisuussasoq
Innuttaasut siunnersuuteqarsinnaanerat pillugu siunnersuut Folketingimi partiinit tamanit akueralugu taasissutigineqarpoq. Folketingillu siulittaasua, Pia Kjærsgaard (DF), naapertorlugu taamatut aaqqissuussineq oqartussaaqataanermik annertusaaneruvoq.
- Innuttaasunik peqataatitsinissamut aaqqissuussineruvoq nutaarluinnaq, oqartussaaqataanermik annertusaasussaq. Siunnersuutit qanoq ittut nassiunneqassanersut, sorliillu taperserluarneqassanersut takussallugu pissanganarpoq, Folketingimit tusagassiorfinnut nalunaarummi januaarip 24-aneersumi taama oqarpoq.
Aaqqissuussinerullu oqartussaaqataanermut iluaqutaanissaa Jørgen Elklitip tunngaviatigut isumaqatigaa.
- Qinersisartut isummersornissaminnut aqqutissaat ataatsimik amerlineqassapput, qinersinerni nalinginnaasuni qinersisarnerup partiiniluunniit sulinerup saniatigut periarfissaassalluni, professori oqarpoq.
AAMMA ATUARUK Namminiilivinnerup Danmarkimit ikiorsiissuteqartarneq unitsissavaa
Siunnersuutilli naammattunit taperserneqarnissaannut tusagassiuutinit sammineqarnerat aalajangiisuussaaq, Elklit isumaqarpoq. Siunnersuutillu Nunatsinni Savalimmiunilu pissutsinut naalagaaffiup akisussaaffigisaanut tunngasut ajornerusumik inissisimassapput, Danmarkimi pissutsit Danmarkimi tusagassiuutinit pingaarnertut sammineqartarmata.
- Tusagassiuuteqartariaqarpoq ajortorsiummik oqaluuserisassanngortinneqartumik saqqumilaartitsisumik, taamaaliornikkut paasineqarniassammat atsiornernik katersisoqartoq. Apeqqutit ilaat, arlaannik peqquteqartumik tusagassiuutinit sammineqanngippata, taava aamma innuttaasut akornanni oqallisigineqarnavianngillat, taamaalillunilu innuttaasut siunnersuummut tapersiisiunnaanissaat qulakkeerneqarsinnaanani, professori oqarpoq.
Innuttaasut siunnersuuteqarsinnaanerinut aaqqissuussineq ukiuni marlunni atuutissaaq matumalu kingorna Folketingimit nalilersuiffigineqassalluni.