Innuttaasut siunnersuutaat siulleq tapersersorneqarluartoq

Borgerforslag.dk-kkut ippassaq siunnersuuteqartoqareerpoq, 10.000-iniillu amerlanerusut ullumi atsioreerlutik.

Qassit atsiorsimanersut uani malinnaaffigisinnaavat.

AAMMA ATUARUK Aaqqissuussamut nutaamut ikippallaartugut

Tassanilu ilinniakkamik killiliinerup 2016-imi atuutilersinneqartut atorunnaarsinneqarnissaa siunnersuutigineqarpoq.

Danskit ilinniarnertuunngorniartuisa kattuffiata siulittaasuat, Jens Philip Yazdani, siunnersuuteqartuuvoq.

- Siunissami imaassanngilaq, inuusuttut qinerseqqinnissaminnut ilinniakkaminnilluunniit annertusaanissamut periarfissaqarnatik nikinnaviissasut. Naalakkersuisulli ilinniakkamik killiliimmata killormuanik iliorput. Periarfissagut killilerpaat. Nikinnaveertilerpaatigut. Inuusuttut siunissarlu sipaagaqarfigaat, Yazdani siunnersuutimini tunngavilersuilluni taama allappoq.

Ilinniakkamik killiliineq ilinniariikkap qaffaseqataanik siullermik ilinnialersinnaajunnaarsitsivoq. Killiliinissalli atuutilerneranit qaammat ataaseq affarlu qaangiutiinnartut allanngortinneqarpoq, ilinniakkap siulliup naammassineranit ukiut arfinillit ingerlareersimatillugit ilinniariikkamut assingusumik qaffasissusilimmut appasinnerusumilluunniit ilinnialernissamut qinnuteqartoqarsinnaalerluni.