GLTolk Danmarkimi kalaallisut oqaluttaasartunik piginnaanngorsaaniartoq

Danmarkimi kalaallit oqartussanik attaveqarneranni inatsisitigut isumannaanneruleqqullugit kalaallisut oqaluttaasartunik piginnaanngorsaaneq oqalutseqartitsivimmit immikkut ukkatarineqarniarpoq.

Allattoq Ann-Sophie Greve Møller

oktobarip 19-at 2024 10:40

Nutserisoq Hanne Petersen

Kalaallisut oqalutsinik piginnaanngorsaanerit, Danmarkimi pisortani kalaallisut oqaluttaasinnaasut pillugit allattorsimaffiliorneq susassaqarfinnilu aalajangersimasuni soorlu eqqartuussiveqarnermut, peqqinnissaqarfimmut isumaginnittoqarfimmullu tunngasuni kalaallisut oqaluttaanermik ukkataqarsinnaaneq.

Tassa kalaallisut oqalutseqartitsiviup GLTolk Aps-ip suliniutigileqqammisaasa ilaat tamakkuupput.

Danmarkimimi kalaallisut oqalutsissaalatsisarneq ukiorpaalunni ajornartorsiutaavoq – tamannalu Danmarkimi kalaallinut 17.000-ngajalluinnaasunut kinguneqarujussuarsinnaavoq.

ANINGAASANIK KALAALLISUT OQALUTSEQARTITSINERMUT DANMARKIP ANINGAASANUT INATSISAANI IMMIKKOORTITSINEQ

Danmarkimi kalaallinut oqalutseqartitsineq pillugu paasissutissanik katersaqarnanilu kalaallisut oqaluttaasinnaasut pillugit allattorsimaffeqanngilaq. Taamaammat inuit ataasiakkaat pisortallu nammineerlutik oqalutsissarsiortarput.
5,8 millionit koruunit Danmarkimi kalaallisut oqalutseqartitsinermik ilisimasaqarnerulernissamut atugassatut Atlantikup Avannaamiunut Danmarkip aningaasanut inatsisaanit immikkoortinneqarput. Tassa 1,45 millionit koruunit tamatumunnga atugassatut ukiut tamaasa 2024-miit 2027-mut immikkoortinneqartassapput.
GLTolk Aps-imik pilersitsisut, Arnajaraq Joelsen aamma Poul Bloch Jensen, tassa taamaaliornissamut aningaasaliiffigisassartussarsiornermi toqqagaapput.

Allisiguk

Taamaammat 5,8 millionit koruunit ukiuni tulliuttuni pingasuni atugassatut Atlantikup Avannaamiunut Folketingimi ilaasortanit nunatsinneersunit immikkoortinneqarput. Taakkua Danmarkimi kalaallisut oqalutseqartitsinermik ilisimasaqarnerulernissamut atussapput. GiTolk Aps-ilu tamatumunnga aningaasaliiffigisassartussarsiornermi tassa toqqagaaqqammerpoq.

- Nuanneqaaq, assoroornikuugatta aamma una suliaq iluatsikkusullugu. Taamaattumik nuannaaqaagut iluatsimmat, Poul Bloch Jensenilu GLTolk Aps-imik pilersitsoq Arnajaraq Joelsen oqarpoq.

Taakkua marluullutik kalaallisut oqalutseqartitsivik GLTolk juunimi pilersippaat.

Inatsisitigut isumannaannerulersitseqataarusuttut

Ilaatigut Danmarkimi kalaallit meerartaasa allamut inissinneqaratarsinnaanerannik suliani kalaallillu Danmarkip peqqinnissaqarfianut attaveqarneranni oqalutsissaalatsisoqartarpoq. Danmarkimi kalaallit naak oqalutseqarsinnaatitaagaluartut pissutsit tassa taamaapput.

Tamannalu Danmarkip inuunermi atukkanik ilisimatusarfiata, Det Danske Forsknings- og Analysecenter for Velfærdip (VIVE) Danmarkimi kalaallit meerartaat allamut inissitat pillugit nalunaarusiaani 2022-meersumi ilalerneqarpoq. Danmarkimilu kalaallisut oqalutsissaalatsisoqartarnerata saniatigut suliani nakerisarsiunngitsunik kalaallisut aamma oqalutsissaalatsisoqartartoq, nalunaarusiami tassani inerniliussaavoq.

Taamaammat aningaasaliissutigineqaqqammertut Danmarkimi kalaallit pisortanut atteveqarneranni oqaluttaasartunik piginnaanngorsaanermik ukkataqarnissamut atorniarpai.

- Ilinniarsimasunik Danmarkimi kalaallisut oqalutsissaalatsisoqaqaaq, oqalutsillu nutsigaat kukkuneqarneragaakkajupput. Tassa kalaallisut oqaluttaasartut nutsigaasa kukkuneqarneragaasarnerat tusarnartaanngilaq.

- Pingaartittorujussuuarput kalaallit Danmarkimiittut inatsisitigut isumannaatsumik pineqartarnissaat. Kalaallisullu oqalutsit aamma piginnaanngorsarusuppagut, innuttaasut aamma eqqarsaatigalugit, Arnajaraq Joelsen oqarpoq.

Aamma atuarukAki-Matilda Høegh-Dam Folketingimi kalaallisut oqalugiareernermini apeqqarissaarfigineqanngitsoq

Danmarkimi kalaallit pisortanut attaveqarneranni oqalutsit nutsigaat amigaateqarpallaartarneragaanikuupput. Tassa oqaatiginiakkat pingaartut eqqunngitsumik nutserneqartarput. Tamanna Naalagaaffiup Danmarkimi kukkunersiuisuisa nalunaarusiaanni 2018-imeersumi inerniliussaavoq.

Ajornartorsiullu tamanna GLTolk Aps-ip soorlu kalaallisut oqalutsitut allagartaqalissutaasinnaasumik tunngaviusumik ilinniartitsinikkut aaqqinniarpaa.

Kalaallisut oqaluttaasartut suliassaqarfimmi aalaajangersimasumi oqaluttaanermik tunngavisumik ilinniarnerminni aamma ukkataqarsinnaassapput.

- Tunngaviusumik ilinniarnerminni qaavatigut ilinniarsinnaavaat soorlu inatsisilerinermut, peqqinnissaqarnermut inuussutissarsiornermulluunniit tunngasuni suliaqartarnissaq. Oqalutsit tassa taamaalilluta piginnaanngorsassavagut, Poul Bloch Jensen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.