Politikki Inuussutissarsiutit

Justus Hansenip Pituffik pillugu suliaq erloqinarnerarpaa

Greenland Contractorsip kiffartuussinissamut isumaqatigiissut siornaalli annariaannaasimagaa Naalakkersuisunut siulittaasuusimasup qaffasissumillu atorfilittaasa Naalakkersuisuni ilaasortaqatini paasitissimanngimmagit erloqinartuuvoq.

Allattoq Andrea Christiansen, Apollo Jeremiassen

marsip 02-at 2015 16:35

2013-mi Naalakkersuisunut siulittaasuusimasoq, qaffasissumillu atorfilittaata, kiffartuussinissamut isumaqatigiissut suliaminni salliutissimanngikkaat, Nunanut Allanut Naalakkersuisup, Vittus Qujaukitsup, tallimanngormat nasuerutigimmagu.

- Naalakkersuisunut taama pisuutitsineq erloqinartuuvoq. Tamassumalu takutiinnarpaa, pisut Pituffimmut tunngasut pillugit Inatsisartunut ilisimatitsisoqartarsimangitsoq. Tamannalu erloqinarluinnarpoq, Nunanut Allanut Sillimaniarnermullu Ataatsimiititaliami siulittaasoq, Demokraatineersoq Justus Hansen oqarpoq.

Aamma atuaruk Vittus: Naalakkersuisuusimasut Pituffik pillugu oqallittarsimanngillat

Sooq, qaffasissumik atorfillit Pituffik pillugu suliaq siornaak salliutissimannginneraat, Nunanut Allanut Naalakkersuisup Vittus Qujaukitsup tallimanngormat KNR-mut oqaatigaa misissorneqassasoq qulaajarneqassasorlu.

Suliaq eqqartuussissuserisumik qaqugu misissorneqassanersoq, ataatsimiititaliaq suli paasitinneqarsimanngitsoq Justus Hansenip oqaatigaa, imalu nangippoq:

- Pituffik pillugu suliap ingerlarnga tupinnarluinnarpoq pisuutitsinerillu imaaginnavillutik. Uanga ataatsimiititaliap siulittaasuatut ataatsimiititaliap sulinermini pitsaanerpaamik tunngavissaqarnissaa qulakkeerniassavara. Aatsaallu taamaaliorsinnaavunga, Naalakkersuisunit paasissutissanik pissarsinikkut, Nunanut allanut sillimaniarnermullu ataatsimiititaliami siulittaasoq, Justus Hansen, Demokraatineersoq, KNR-imut taama oqarpoq.

Aamma atuaruk Vittus: Pituffik pillugu suliaq toqqissisimanarunnaarpoq