GIF-mi pissangapput: Porskimi pissartanngorniunnissat nalorninartumiipput

Timersuutit arfineq pingasunit ikinnerunngitsut porskip nalaani pissartanngorniuffiussapput, tassanilu silaannakkut angallanneq pinngitsoorneqarsinnaanngilaq.

Taamaattumik Kalaallit Nunaanni timersoqatigiit kattuffiata GIF-ip Air Greenlandip aamma Dansk Metalip timmisartulerisut akissaataat pillugit isumaqatigiinniarnerat pissangallutik malinnaaffigaat.

Ukiummi marluk kingulliit corona pissutigalugu timersornikkut aaqqissuusaat taamaatiinnartareersut unammisaqattaaqqilernissamut isumalluartoqarpoq.

AAMMA ATUARUK Suliumajunnaarnissamut ilisimasalik: Mekanikerit Air Greenlandimut pissaaneqarput

- Assorujussuaq ajuusaarnartussaavoq Air Greenlandip timmisartulerisullu akissaatit pillugit isumaqatigiinniarnerat ajalusuussappat timersorneq eqqugaassappat, GIF-mi siulittaasoq Nuka Kleemann KNR-mut oqarpoq.

- Corona pissutigalugu killilersuinerit matoqqatitsinerillu ukiut marluk kingulliit assut eqqortarpaatigut. Assorujussuaq ajuusaarnartussaavoq timersortartut piareersarluarsimasut aaqqiagiinngittoqarnerani eqqorneqassappata. Timersortartummi sungiusarsimanermi killiffiannik uuttuinissaq maanna pisariaqartilluinnarpaat, Nuka Kleemann oqarpoq.

Air Greenlandip aamma Dansk Metalip isumaqatigiinniarnerit toqqaannartumik akuliuffiginianngilai taamaallaat timmisartuussiunnaarnerup kingunerisinnaasai sammerusunnerullugit.

Umiarsuit killilimmik ingerlaarput

Ukiuunerani timersuutini assigiinngitsuni, assammik arsarnermi, isikkamik arsaannermi, sulorarnermi aamma nerrivimmi arsaararnermi pissartanngorniuttoqartussaavoq. Timersuutit tamarmik silaannakkut angallanneq pinngitsoorsinnaanngilaat pissartanngorniuttoqassappat.

- Umiarsuit kisimik periarfissaalissapput taakkulu maanna sumiiffinnut ikittuinnarnut angalasarput kingusinnerusukkut aatsaat ingerlaarfitik annertusissallugit, Nuka Kleemann oqarpoq.

AAMMA ATUARUK Sulisut peqatigiiffiat: Mekanikerit marluk timmisartumik angallanneq unitsissinnaagaat

Taamaattumik silaannakkut angallannermi aaqqiagiinngittoqassappat pissartanngorniunnernik taamaatitsisoqarsinnaanera ernumanartoqartippaa.

- Pissartanngorniunnissat piffissamut allamut nuunnissaat ajornakusoorsinnaavoq sulinngiffeqarnissanik annaasaqarnissaq pinngitsoorniarlugu porskikkunni pissartanngorniunnissaq toqqarneqartarmat. Taamaattumik nerioqaagut silaannakkut angallanneq akornusernagu Air Greenland aamma Dansk Metal isumaqatigiissinnaajumaartut, Nuka Kleemann naggasiivoq.