GIF-ip siulittaasuata meeqqat inuusuttullu amerlanerusut timersulersinneqarnissaat takorluugaraa

Timersoqatigiit kattuffiat ukiuni tulliuttuni aningaasassaqarneruvoq. Tassa 2025-mit 2027-mut 30 millioninik aningaasaliisoqarpoq. Ukiumullu 10 millionit koruunit pissarsiarineqartassallutik.

Inatsisartunut qinikkat 2025-mut aningaasanut inatsimmik timersoqatigiit kattuffiannut aningaasanik immikkoortitsiffiusumik akuersineranni tamanna pivoq.

Tamannalu Kalaallit Nunaanni Timersoqatigiit Kattuffiata siulersuisuini siulittaasup, Claus Erik Nielsenip soorunami nuannaarutigaa, taassumalu aningaasassaqarnerulerneq ilaasortaqalernerulersitsissasoq takorloorpaa.

- Aningaasat inuiaqatigiinni suliaqarnermi pitsanngorsaanermik annertunerulersitsinermillu kinguneqarnissaat neriuutigaara. Peqatigiiffinnut nammineq kajumissutsiminnik suleqataasunik amerlanerusunik sungiusaasunillu amerlanerusunik pissarsiniassaagut, taamaalilluta inuusuttut amerlanerusut sungiusarsinnaassallutigit.

- Inuiaqatigiinnimi amerlasuunut inissaqartitsilluarluta attaveqaataalluarpugut – aamma inuusuttunut ilaqutariinnit atugarliortuneersunut, taanna oqarpoq.

Sungiusaasut pikkorissarneqassasut

Claus Erik Nielsenip aningaasat sungiusaanut pikkorissaanermut atorneqarnissaat kissaatigineruaa – sungiusaasummi amigaataangaatsiartut, taanna oqarpoq.

- Amerlanerusut sungiusaasunngortitsinnginnermi pikkorissaasinnaagutta sungiusaasunngorusunnissaat neriuutigaara, taamaalillutik pissutsit assigiinngitsut qanoq aaqqiivigisassanerlugit ilisimasaqarfigissavaat. Sungiusaanerup nalaani aammali unammillernartoqarpat, taanna oqarpoq.

Takorluukkat piviusunngorsinnaasut

Siulersuisut siulittaasuata takorluugaata piviusunngunnginnerani isumaqatigiissut politikerinit allaganngortinneqartariaqarlunilu siulersuisut sinnerinit taperserneqartariaqarpoq.

Inuusutulli amerlanerusut timersorusunnerulerneranik tamanna inerneqartariaqarpoq, siulersuisullu siulittaasuat takorluugaqarluarsinnaatinneqaruni klubbit taamaalillutik piginnaaneqartunik ineriartortitsisinnaallutillu nunat tamalaat akornanni malunnaateqarlualersinnaassapput.

- Annerusulerluta nunat tamalaat unammisarneranni peqataalersinnaanissarput takorluukkami annerpaavoq, kisianni nunatsinni sumiiffinni peqatigiiffiit aallartiffigeqqaassavugut, Claus Erik Nielsen oqarpoq.

Kisianni peqatigiiffiit assigiinngitsut aningaasat pissarsiarisaat qanoq atorneqassanersut nammineq siulersuisullu sinnerisa aalajangersinnaavallaanngilaat, kisianni:

- Malittarisassaliorsinnaavugut kattuffimmullu sinaakkusiisinnaalluta, taanna oqarpoq.