Meeqqat allamut inissinneqartarnerannut akerliuneq Nuummi Københavnimilu inunnut ataatsimoortitsivoq. Inuit kalaallinut angajoqqaanut danskit oqartussaasuinit iliuuserineqartartunut akerliunertik qulliliuutigalutik takutippaat.

Naalakkersuisut angajoqqaatut piukkunnaateqarnermut eqqarsartaatsikkullu inissisimanermut misissuisarnernik oqallisaaqisunik – FKU-mik taaneqartartunik - atuineq inuttut pisinnaatitaaffinnik unioqqutitsinertut kalaallinillu assigiinngisitsinertut taanikuuaat.

Oqallinnerli oqimaaqatigiissagaavallaanngitsoq, immikkut ilisimasalik isumaqarpoq.

- Eqqarsartaatsikkut piginnaasanik misissuisarnerit politikkikkut pingaartinneqartupilussuusut nalunngilara. Oqallinnerli taamaattoq oqimaaqatigiissagaanngilaq, VIVE-mi misissueqqissaarnermi pisortaq, oqallinnermillu aallartitsisumik 2022-mi nalunaarusiortoq, Karen Margrethe Dahl, oqarpoq.

Taamali oqareerluni, angajoqqaat ernumanerat paasinarluinnartoq, taanna oqarpoq.

- Allamut inissiinissamut suliani angajoqqaat kalaallillu misissueriaatsinut oqaatsitigut kulturitigullu kalaallinut tulluarsarneqanngitsunut ernummateqarnerat paasisinnaavara. Tamannali ilutigalugu oqallinnermi oqimaaqatigiissaarisoqarnissaa amigaataasoq eqqarsarpunga, Karen Margrethe Dahl oqarpoq.

Sooq taakkua aalajangiisuuvissortunnginnerat paasissagaanni, allanut inissiisanermi suliat tamarmik ingerlarngi qiviarnissaat pingaarpoq.

Naliliinerit aalajangiinerni sunniuteqarnerpaajugajunngitsut

Angajoqqaatut piukkunnaaateqarnermut misissuisarnerit meeqqamik allamut inissiinissamut aalajangiinerni qaqutigut pingaarnerpaajusartut, tusagassiuutillu allaaserisartagaattut pingaartiginngitsut, Karen Margrethe Dahl nassuiaavoq.

- Tusagassiuutini saqqummiunneqartartutuulli pingaaruteqartigisuaannarunanngillat. Nammineq kajumissutsimik suliniutit misiilereerlugit ingerlariaqqissinnaajunnaaraanni iliuuseqartariaqarlunili takusinnaagaanni nalileeriaatsit atorneqartarput.

Isumaginninnermik siunnersortit allamut inissiisariaqarnermik angajoqqaatut piukkunnaateqarnermut suli misissuisoqannginnerani nalileereersinnaasartut, Karen Margrethe Dahl oqarpoq.

- Angajoqqaatut naliliinerit atorneqartarunnaarsinnaapput. Kisianni meeqqat angerlarsimaffiup avataanut inissiinneqarnissaannut aalajaangiinernut allannguivallaartarnavianngissasoraakka.

Karen Margrethe Dahl Danmarkip inuunermi atukkanik ilsimatusarfiani VIVE-mi misissueqqissaarnermi pisortaavoq, kalaallinillu meeqqanik allamut inissiisarnermik 2022-mit nalunaarusiamik allattuulluni. Assi © : VIVE

Isumaginninnermummi siunnersortit naliliinerat aamma arlalinnik allanik tunngaveqartarput, soorlu: angajoqqaat suliffeqarnermut najugaqarnermullu tunngatillugit atugaat, nakuusertoqartarnersoq, angerlarsimaffimmi imigassamik aalakoornartortalimmik ikiaroornartunilluunniit atornerluisoqarnersoq meeqqanilluunniit allamut inissiisoqartareersimanersoq.

Allamut inissiinissamut suliat meeqqerivinnit, atuarfinnit assigisaanniilluunniit nalunaaruteqartoqarneranit aallartikkajuttut, Karen Margrethe Dahl nassuiaavoq. Meeqqap angajoqqaaminit isumagineqarluarnissaanut meeqqap angajoqqaalluunniit atugarliorpallaarnissaanut pasitsaassisoqaraangat taamaattoqartarpoq.

Taamaattoqaraangat isumaginninnermut siunnersorti suliamut ilanngunneqartarpoq, taannalu pitsaaliuinermik, soorlu ilaqutariinnik katsoorsaanermik angerlarsimaffimmilu susoqartarneranik nakkutiginninnermik suliaqartarpoq.

Isumaginninnermut siunnersortip meeraq allamut inissinneqassanersoq isumaliutigippagu, angajoqqaatut piukkunnaateqarnermut misissuineq aallartinneqarsinnaavoq.

Misissuinerilli arlaqarput. Isumaginninnermut siunnersorti tarnillu pissusaanik immikkut ilisimasalik oqaloqatigineqalertarput, taakkualu angajoqqaaq meeqqaminik isumaginnilluarsinnaanersoq perorsaalluarsinnaanersorlu nalilertarpaat.

- Angajoqqaanik misissuinerit suliat ilagiinnarpaat, suliani kingulliunneqartartut. Misissuinerit peerneqarsinnaapput, aalajangiinernulli allannguivallaartarunarnavianngillat.

- Isumaginninnermummi siunnersortit meeqqat angerlarsimaannarnissaasa illersorneqarsinnaajunnaarneranik naliliinnginnerini aalajangertoqareertarpoq, Karen Margrethe Dahl oqarpoq.

Danmarkimi kommunit angajoqqaatut piukkunnaateqarnermut misissuisarnernik atuiunnaarnissamik isumaliuteqarnissaannik kaammattuuteqarluni danskit isumaginninnermut ministeriat, Sophie Hæstorp Andersen, kommuninut allagaqareerpoq.

Maanna misissueriaatsinut allamik maanna qinigassaqanngilaq, misissueriaatsilli nutaat kalaallit oqaasiinut kulturiannullu tulluarsakkat maanna suliarineqaleruttorput, atorneqarsinnaanissaannulli ukiut arlallit ingerlasinnaapput.