Gerhardt siulittaasunngoqqippoq

Kisianni tassa Gerhardt Petersen, Qaqortumi najugalik, 14-init qinerneqarluni siulittaasunngoqqippoq, Ove Thomassen arfineq-marlunnit taaneqartoq. Pappiara taasivissaq ataaseq allaffigineqarsimanngilaq.

Gerhardt Petersenip siulittaasutut qinigassanngorteqqinniarnini ullut arlallit matuma siorna nalunaarutigereerpaa, Ateq alla tassatuaagaluarpoq  Steen Lynge. Atassutip Nuummi immikkoortortaa sisamanngormat qinersinermi nalunaarpoq, Steen Lynge siulittaasutut innersuukkitsik. Taaannali Radioaviisimut ippassaq oqarpoq, suli aalajangerani. Ullaarlu tassa qujaannarsimavoq.

Sassarporli Ove Thomassen. Taanna nammineq piumassutsiminik sassartoq,

Atassutip Nuummi immikkoortortaani siulittaasoq, Hans Lyberth aperaarput Gerhardt Petersenip siulittaasunngoqqinnera qanoq qisuariarfigineraa:

- Soorunami ataqqivara ataatsimeersuarnerup aalajagingaa.

Ove Thomassen siulittaasutut illit perusunnerugaluarnerpat?

- Taamatut oqarusunngilara, ataqqisarpara amerlanerussuteqartut aalajangernerat.

Suminngaanneerneq apeqqutaasarnerpa?

- Oqariartuutigisarnikuuara siulittaasup Nuummiissinnaanera pingaaruteqartoq, allaffeqarfiup qitiusumik inissisimanera annerusumik tunngavigalugu, soorunami aamma politikkikkut pisut annerpaat Nuummi ingerlapput, taannalu aallaavigalugu siulittaasup nuumminnissa ujartortarsimavarput.

Partii Atassut ukiuni kingullerni ersarippallaarsimanngilaq, ersarinnerusariaqaraluarpisi?

- Folketinginmi qineqqusaartut akornanni eqqartorneqartut ilagisimavaat, aamma aaqqissuussaanikkut siulittaasumut tulliuvunga, tassanilu  akisussaaqataallunga, politikkitta anninniarnera ersarippallaarsimanngilaq tamatigut, taannalu   iliuuseqarfigineqartariaqartoq sukkanerpaamik ataatsimeersuarnermi eqqartorneqarpoq, Hans Lyberth taama oqarpoq.

Taanna aaqqissuussaanikkut siulittaasup tulliatut qinigassanngorteqqinngilaq, partiimili allatsituinnaq sulissalluni. Aaqqissuussaanikkut siulittaasup tullinngorpoq Folketingimut qinigassanngortittoq, Arnannguaq Blytmann, Aasianneersoq. Taanna 15-init taaneqarpoq, Ove Thomassen arfineq-marlunnit taaneqartoq.

Inatsisartunut ilaasortaq, Qaasuitsullu Kommuniani kommunalbstyrelimut ilaasortaq, Knud Kristiansenip Siverth K. Heilmann paarlallugu politikkikkut siulittaasup tulliatut unammillerteqarani qinigaavoq