Politikki Inuussutissarsiutit

GE: Sipaarniarnikkut aningaasalersuisoqarsinnaavoq

Kiffartuussinissamut isuamaqatigiissutinut pitsanngorsaanissamut Naalakkersuisut amerlanerusunik aningaasaliiniarput. Naalakkersuisulli immikkut sipaarniarnikkut aningaasanik nassaarniartariaqaraluartut, GE isumaqarpoq.

Allattoq Inge S. Rasmussen

novembarip 07-at 2016 07:54

- Kiffartuussineq naammaginanngitsoq akisusinnaavoq, taamaatsillugulu sipaarniartoqarsinnaanngilaq.
Kisianni inuiaqatigiinni aningaasaqarnikkut naatsorsuutit imminnut ataqatigiittariaqarput, Sulisitsisut peqatigiiffianni pisortaq Brian Buus Pedersen oqarpoq.

Aamma atuaruk Nunatta karsia millionerpassuarnik iluanaaruteqarnerusoq

Kiffartuussinissamulli isumaqatigiissutit sunik imaqarnersut taassuma ilisimannginnerarpaa. Naalakkersuisullu amerlanerusunik aningaasaliissappata tamanna kujataanut pitsanngorsaassanersoq, pisortap akisinnaanngilaa.

Qularutiginngilaali kiffartuussinissamut isumaqatigiissutit inuiaqatigiinnut pingaaruteqarluinnassammat.

- Ingerlasussanik piareersaaneq inuiaqatigiinnut sutigut tamatigut pingaaruteqarluinnarpoq, inunnut ataasiakkaanut aamma inuussutissarsiornerup ineriartortinneqarneranut pingaaruteqarluni.

Aamma atuaruk Naalakkersuisut kiffartuussinissamik isumaqatigiissutinut aningaasaleeqqittut

Kiffartuussinissamut isumaqatigiissutinut immikkut aningaasaleeqqinnissamut pilersaarut GE-mit ilassilluarneqanngilaq.

Aningaasanut inatsit naatsorsuutigisamit 55 millionit koruuninik angusaqarfiuneruvoq, kiffartuussinissamullu isumaqatigiissutit taakkunannga aningaasalersorneqassanngitsut Brian Buus Pedersenip neriuutigaa.

Sipaarniarnikkummi aningaasat nassaarineqarsinnaasut, taassuma siunnersuutigaa.

- Aningaasarsiorluarneq sillimmatigineqarsinnaanngilaq, isertitat ilaat allanngorarmata. Inuiaqatigiillu ineriartornerat pissutaalluni tamanna Kalaallit Nunaata aningaasaqarneranut sunniuteqassaaq. Utoqqaliartorpugut tamannalu eqqumaffiginerusariaqarparput, Brian Buus Pedersen oqarpoq.