GA qinersisartunut kaammattuisoq
Politikkerinik aaqqissuusseqqinnissamik siammasissumillu suleqatiginninnissamik neriorsuisunik qinerseqqullugit, Sulisitsisut Peqatigiiffianni siulersuisut siulittaassuat Henrik Leth qinersisartunut kaammattuivoq.
Uani qinersinissami sammineqartariaqartut unammillernartut tallimat, sulisitsisut tusagassiortunik katersortitsinermi saqqummiuppaat.
- Aalisarneq inerisarneqarlunilu siunissami atasinnaanngorsarneqartariaqartoq. Sulisartut tikisitat qanoq ikilisarneqarsinnaappat. Ilinniartitaaneq qanoq pitsanngorsaavigineqassava. Aamma sanaartorneq. Isumaqarpugut aningaasat sanaartornermut atugassat sanaartornermut aningaasaateqarfimmi uninngaannartut. Kiisalu aatsitassaqarneq pingaartitatsinni tallimaasuni tikkuarpagut, Henrik Leth KNR-imut oqarpoq.
Tamakkulu tamarmik siuariartussappata politikkikkut aaqqissuusseqqinnerit annertuut pingaarutillik pisariaqartut Sulisitsisut oqariartuuteqarput. Aaliangiinerillu annertuut pissappata politikkikkut siammasissumik suleqatigiissinnaaneq pisariaqartoq, Nunarput patajaatsumik ingerlanneqartariaqarmat.
- Aaqissuusseqqinnerit politikkikkut amerlanerussuteqaqqarluni aaliangiiffigineqartut upperinngilagut. Ineriartortitsinissamut aningaasaleerusutut toqqissisimasariaqarput, taamaammat aaqqissusseqqinnissamut aammalu siammasissumik suleqatigiinnissamut piumassuseqarnissaq pingaaruteqarpoq, Henrik Leth isumaqarpoq.
Taanna aamma isumaqarpoq Nunarput ineriartortinneqassappat aningaasaliisartut namminersortut aningaasaliisuusariaqartut. Aningaasaliiumasoqassappalli politikkikkut patajaassuseq pisariaqarpoq.
- Aningaasaliiniaraanni sinaakkutaasut siunissamut ungasinnerusumut atasinnaasut pisariaqarput. Aningaasaliiffigineqartussat ilarpassui, soorlu takornariaqarnermut, alisarnermut aatsitassarsiornermullu tunngasut, ukiuni qulini 15-ini atasarput. Taamatsillugulu ukiut qinigaaffiit pingasut tallimaannaasarnerat iluaqutaavallaanngilaq. Pataajaassuseq pisariaqartinneqarpoq. Nunarput aningaasaliiffigineqarsinnaasutut tatiginassuseqaleqqittariaqarpoq, Henrik Leth radioaviisimut oqarpoq.
Sulisitsisut qinersisoqalernerani pingaatsitaminnik saqqummiinerat ilaasortanit inuiaqatigiinni nuimanerunissamik kissaateqarnermiit aallaaveqartoq Sulisitsisuni siulittaasut oqaatigaa.