GA: Politikerit sinnattuaqinaveersaartariaqarput
Brian Buus Pedersen, GA-mi (Sulisitsisut) pisortaq, aamma Henrik Leth GA-mi siulersuisut siulittaasuat partiit neriorsuavallaannginnissaannik qinnuigai.
- Naalakkersuinermik suliallik qineqqusaarnermi sinnattuaqinaveersaartariaqarput aningaasarpassuarnillu nalilinnik qineqqusaarnaveersaartariaqarlutik, Sulisitsisut tusagassiutinut nalunaarummi allapput.
Taama nalunaarnerminnut Nunatta anigaasaqarnera ajortumik ingerlanera ernumanertik tunngavilersuutigaat.
Ukiut kingulliit Nunatta aningaasaqarnikkut kinguariarsimanera ukioq manna sakkortunerulerluni nangissamasoq GA-mit aamma ernumanartinneqarpoq.
- Tamatumunnga patsisaavoq aatsitassarsiornikkut ikummatissarsiornikkullu ingerlatsinissaagaluit takkutinngitsoorsimaneri.
Aamma oqaatigaat aalisarnikkut kinguariarneq, takornariaqarnerup apparsimanera aammalu illuliortitsinikinneruneq sanaartornikinneruneq, suliffeqarnikkut ajornartorsiutit, minnerunngitsumillu inuusuttut suliffissaaleqisut amerliartorneri Nunatta aningaasaqarnerata ingerlanerluneranut takussutissaasut.
- Sulillutalu aallartinngikkutta aningaasaqarnikkut siuariartornissamut periarfissalunneq attatiinnassavarput, Henrik Leth aamma Brian Buus Pedersen allapput.
Siammasissumik suleqatigiinneq pisariaqartoq
Politikkerit nuimasut arlallit partiit akornanni siuammasissumik suleqatigiinnissaq pisariaqartoq oqariartuutigaat, tamannalu Sulisitsisut ilassailluarpaat.
- Nunarput aningaasaqarnikkut ajalusoornissamut ima qanitsigaaq, naalakkersuinikkut makeqqinnissaq pisariaqarluinnartoq anguniarlugu siammasissumik suleqatigiinnikkut annertuunillu aaqqissuusseqqinnikkut aatsaat nunami atugarissaarneq inuillu atukkamikkut naligiinnerulernissaat qulakkeerneqarsinnaalluni, Sulisitsisut isumaqarput.
Qinersisartut akisussaasuusut
Innuttaasut naalakkersuinikkut ingerlatsisusssnik qinersilerunik malinnaalluarlutillu eqqarsarluarnissaat Sulisitsisut aamma oqariartuutigaat:
- Inatsisartunik pimoorussisunik, nunamik tamarmik eqqarsaatiginnittunik, pisariaqarluinnartunik aaqqissuusseqqinnissanut piumassuseqarlutillu piginnaanilinnik aammalu Nunatta tamarmi naalakkersuinikkut aningaasaqarnikkullu toqqammavissaanik pisariaqarluinnartumik pilersitsisinnaasunik qinersinissaq, qinersisartut akisussaaffigaat.
