GA: Pissutsit ajornerusut
Nunarput aningaasaqarniarnikkut ingerlanerlunnerarlugu, Aningaasaqarnermut Siunnersuisooqatigiit nalunaarusiaminni oqarnerat, Sulisitsisut peqatigiiffiata, GA-p, tupaallaatiginngilaa. Aningaasaqarnermut Siunnersuisooqatigiilli siulittuutaannit pisutsit ajornerusut, pisortap Brian Buus Pedersenip nalilerpaa.
Aamma atuaruk Aningaasaqarnermut Siunnersuisooqatigiit sakkortungaatsiartumik mianersoqqussuteqarput
- Nunatta aningaasaqarnera qajannarluinnarpoq, pitsanngoriartornissaanullu aalisarnermilu periarfissat aalisakkallu akiisa qaffakkiartornissaat apeqqutaalluinnarpoq. Raajartassat, qanoq amerlatiginissaat suli ilisimanngisagut, ikileriassagaluarpata, taava 2015-i isumalluarnanngilaq, Brian Buus Pedersen naliliivoq.
Aaqqissuusseqqinnissaq pisariaqartoq
Aningaasaqarnermut siunnersuisoqatigiit erseqqissaatigaat, aningaasaqarneq pitsaaneruleqqullugu aaqqissuusseqqinnissaq pisariaqavilersimasoq.
- GA tamatumunga isumaqataalluinnarpoq. Aaqqissuusseqqittoqanngilaq, susoqannginneranilu pisariaqartitsineq suli alligaluttuinnarluni, Sulisitsisut peqatigiiffiani pisortap oqaatigaa.
Inissianik amigaateqarneq ineriartornissamut killiliisoq
Aamma inissialiorneq unikaallatsillugu Qaqortumi timmisartoqarfiliornissaq Naalakkersuisut 2015-imi aningaasaliiffigimmassuk GA-p isoraa.
- Nutserfiusuni inissianik amerlanerusunik amigaatigaateqarpugut, inissialiortoqanngippammi sulisartut nutsersinnaanerat killilerneqassaaq, inissaaleqinerlu ilinniartitaanerup inuussutissarsiutillu ineriartornissaannut killiliisuuvoq, GA-mi pisortaq Brian Buus Pedersen nassuiaavoq.