Aningaasaqarnermut Siunnersuisooqatigiit sakkortungaatsiartumik mianersoqqussuteqarput
Aningaasaqarnermut Siunnersuisooqatigiit 2014-imut nalunaarusiartik maanna saqqummiutileruttorpaat. Aningaasaqarnermillu ilisimasallit Naalakkersuisunut mianersoqqussuteqarnerminni paatsuugassaanngillat, pisortammi aningaasaqarnerisa ataqatigiikkunnaarsimanissaat aarleqqutigaat. Siunnersuutit akisuupilussuit aningaasanut inatsimmi pingaarnersiuinermut ilanngunnagit Inatsisartuni akuersissutigineqarsimanerat ilaatigut taakkartorpaat. Akuersissutigineqartullu akisuupilussuit ilagaat Inatsisartut ataatsimiittarfittaassaat aammalu nunalerinermut tapiissutit amerlineqarsimanerat.
Takuneqarsinnaasumit suli ajorneruvoq
2014-imi sinneqartooruteqarnissaq naatsorsuutigineqaraluartoq, immikkut ilisimasallit naliliinerat malillugu, pisortat aningaasaqarnerat ilungersunartutut isikkoqarpoq. Imaluunniit Aningaasaqarnermut Siunnersuisooqatigiinnit oqaatigineqartutut: 'Pisortat aningaasaqarnerisa ineriartornerat 2014-imut DAU-mi sinneqartoorutaasunit aarlerinarnerusumik isikkoqarpoq.’ Aamma Nunatta aningaasaqarnera Qaqortumi mittarfissamit tatineqassasoq aningaasaqarnermik ilisimasallit oqaatigaat.
2016-imut 2017-imullu aningaasanut inatsisissat aningaasaqarnermik ilisimallit suli ernumartoqartinneruaat. Aappaagumut aningasaanut inatsimmi amigartooruteqarnikkut ukiut tulliini sinneqartooruteqarnissaq pilersaarutigineqarpoq. Politikerilli aaqqissuusseqqinnissat pisariaqartut akuersissutiginissaannut maannamut suli sapiissuseqarsimanngillat. Aaqqissuusseqqinnerit taakku 300 millionit koruuninik isertitsissutiginiarneqarput, Aningaasaqarnermulli Siunnersuisooqatigiit allapput aaqqissuusseqqinnissamut suliniutissanik tigussassunik suli takusassaqanngitsoq. Taakkulu pitinnagit Nunatta aningaasaqarnera ilungersunarneruleriartuinnaassaaq.
Avaleraasartuut isumalluutiginiarneqarput
Tassungalu atatillugu avaleraasartoorniarnermit isertitat nutaat isumalluutiginiaaannarneqarsimapput. Avalaasartoorniarnermiimmi isertitaqarnikkut ukiormannamut missingersuutit sinneqartooruteqarfiusinnaapput. Peqatigitilluguli nunatta aningaasaqarniarnerata nalorninartupilussuarmik inissisimanera avaleraasartuunut akitsuutip toqqortersinnaasimavaa.
Ataatsimut isigalugu, siulittaasup Torben M. Andersenip siulittaasullu tulliata Ulla Lyngep, Nunatsinni politikerinut sakkortuupilussuarmik mianersoqqussuteqarput: Maanna iliuuseqartariaqarpusi, taamaaliunngikkussimi ukiuni tullerni ilungersunartupilussuarmik inissisimasoqalissaaq.
