GA: Atuarfitsialak iluatsinngitsoq

Nunatsinni sulisitsisut peqatigiiffiat GA Atuarfitsialammut sakkortuumik uparuaavoq. Sulisitsisut peqatigiiffiat ilaasortami ukioq manna ilinniartoqarneranik ilinniartoqarnissaannillu misissuereerluni taama uparuaateqarpoq.

GA isumaqarpoq meeqqat Atuarfitsialammi iluamik ilinniartinneqartarsimanngitsut, tassa ilikkagassaminnik, ilinnialerunik atugassaminnik naammattunik tunineqartarsimanngitsut.

- Atuarfitsilammi ajornartorsiuterpassuit pissutigalugit inuusuttorpassuit atuarunnaartarput tunngaviusumik ilikkartariaqakkaminnik pissarsisimanatik, pissarsiaqarsimannginnerallu ilinniartunngornerannut kinguneqarnerluttarpoq, atuagarsornikkut suliassanillu aallussaqarniarnerannut, Ole Rud GA-p pisortaa internettikkut nittartakkaminni taama allaaserisaqarpoq.

Atuarfitsialaap taama iluatsinnginneranut qinikkat akisussaasuusut Ole Rud isumaqarpoq.

- Inuusuttut amerlanerit ilinnigaqalissappata, Atuarfitsialak annertuumik pitsanngorsartariaqarpoq, suliassarlu tamanna qinikkaniippoq, Ole Rud allappoq.