Futsalimik unamminermi Nunatta Danmark ajorsartippaa

Danmarkimi futsalimik arsallaqqinnerpaat ilaat ikinngutigiittut unammiartorlutik Nunatsinnut sapaatit-akunnerata naanerani tikeraarmata, Nunatsinni angutit illup iluani arsaallutik nunanut allanut unammisartut Nuummi isiginnaartoqarluarlutik takutsilluarput aliikkusersuilluarlutillu.
Assi © : Screendump, KNR.gl
Allattoq Camilla Dam
novembarip 09-at 2015 05:31
Nutserisoq Simon Uldum -

Arfininngormat unamminermi naligiipput, unammineq 2-2-mik inerneqarluni, sapaammilu unammisoqarmat Inussivimmi tv-kkullu isiginnaartut kalaallit 5-4-mik ajugaanerat nuannaarutigisinnaanngorpaat.

AAMMA ATUARUK Nunatta Danmarkillu futsalimik unamminerat KNR-ip aallakaatissavaa

Arfininngormat unamminermi danskit aallartilluaraluarput, Niklas Thorleifsenilli isertitsineratigut unamminerup immikkoortua siulleq 1-1-imik inerneqarpoq. Johan Bidstrup unamminerup immikkoortuata aappaani 2-1-imut målermat timersortarfissuarmi nuannannersuaqarpoq, tikeraalli ajorarluartumik aamma isertitsipput unamminerlu 2-2-mik inerneqarluni.

Arfininngormat nunamut allamut unammineq uani isiginnaarsinnaavat

Kalaallilli inussiarnisaarnerat sapaammi killeqarpoq. Anders H. Petersenip Katu Madsenillu målernerisigut kalaallit unamminerup immikkoortua siulleq naammassimmat 2-0-imik siuaqqapput. Danskit unamminerup immikkoortuata aappaani marloriarlutik målerput naligiittoqalerlunilu, taavali danskit namminneq ajuuffimminnut målertoorput kalaallillu 3-1-imik siuaqqalerlutik. John Ludvig Broberg 4-1-imut målermat timersortarfissuarmi nuannannersuaqarpoq. Danskillu 4-2-mut målermata Katu Madsenip arsarluaqisup akillugut 5-2-mut målerpoq.

AAMMA ATUARUK Illup iluani isikkamik arsaattartut nunanut allanut unammisartuisa Danmark unammisaavaat

Danmark måleqqippoq inissimanerlu 3-5-inngorluni, unamminerlu naammassiliivissoq 4-5-imut måleqqipput nunanullu allanut unammisartut timersortarfissuarmilu isiginnaartut taamaalinerani ajugaaneq kusanartoq nuannassutigilereerpaat.

Nunarput qanoq ililluni Danmarkimut ajugaanersoq uani isiginnaaruk.

Katu Madsen sapaammi ajugaanerup arfininngornermilu unamminerup naligiiffiusup kingorna arsallaqqinnerpaatut toqqarneqarpoq.

Futsalimik nunanut allanut unamminerit Nunatsinni isikkamik arsaattartut kattuffiata aammalu Dansk Boldspil-Unionip suleqatigiillutik Nunatta siunissaq ungasinnerusoq eqqarsaatigalugu Europami isikkamik arsaannerup iluanut pulajartortinnissaanut pilersaarutaannut aallarniutaavoq.