Illup iluani isikkamik arsaattartut nunanut allanut unammisartuisa Danmark unammisaavaat

Nunatta illup iluani isikkamik arsaattartut nunanut allanut unammisartui, tassa futsalertartui, Kalaallit Nunaanni arsaattartartut kattuffiata GBU-p, Danmarkimilu arsaattartut kattuffiata DBU-p nutaamik isumaqatigiissusiorneratigut danskit nunanut allanut unammisartui novembarip ulluisa arfineq-aappaanni arfineq-pingajuannilu unammisussanngorput.
Assi © : GBU
Allattoq Jonas Fievé
oktobarip 29-at 2015 06:15
Nutserisoq Mads Lynge

GBU tusagassiuutinut taama nalunaaruteqarpoq.

Danskit futsalertartui Nuummut novembarip ulluisa tallimaanni tikissapput, marloriarlutillu unamminissaat pilersaarutaalluni:

- Nunanut allanut unammisartut Nunatsinni unammisinnaanissaat GBU-p aaqqissuussinnaammagu nuannaarutissaavoq. Danskillu nunanut allanut unammisartui Nunatsinnukarsinnaanissaat qulakkeerneqarmat nuannaarutissaalluni. Unamminerit pissanganarlutillu isiginnaariat amerlanissaat neriuutigaarput, GBU-p siulittaasua John Thorsen oqarpoq.

Unammineq siulleq arfininngornermi novembarip ulluisa arfineq-aappaanni unnukkut nalunaaqutaq arfineq-marlunut pissaaq, unamminissalli siuliani ualikkut nalunaaqutaq tallimaniit assigiinngitsunik aamma unammisoqartarumaarluni.

Nunanut allanut unammisartut taava Danmarkimut sapaammi novembarip ulluisa arfineq-pingajuanni unammeqqissapput, tamatumuuna unnukkut arfinermut unammisoqarumaarluni. Unamminerit allat ualikkut nalunaaqutaq sisamanut aamma aallartikkumaarput, Inussivimmilu unammisoqassalluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk