Futsal: Kalaallit Norgemut naligiiginnarput
Nunat avannarliit futsalimi unammiuaarneranni Nordic Cupimi kalaallit Norgemut ajugaanissaminnut sekundialuinnaat sisamanngornermi amigaatigaat. Unamminermi 2-2-mik naligiiginnarput sekundit qulingiluaannanngortut naligiilissutaasumik Norge isertitsimmat.
Nordic Cup Sverigemi illoqarfimmi Karlskronamik maanna pivoq tassanilu Nunarput, Sverige, Norge aamma Danmark peqataapput.
Pingasunngornermi unamminermi siullermi kalaallit Sverigemut 7-1- ik ajorsarput sisamanngornermili Norgemut unammilluarnerullutik.
Unammineq aallartisimatsiaannartoq Patrick Frederiksen kalaallit siuartillugit 1-0-mut isertitsivoq. Anføriusoq Lars Erik Reimer frisparkimi toqqaannartumik isertitsilluni 2-0-mut siarnerutitsivoq. Muminngitsiarnermili Norge siullermeerluni isertitsivoq.
Kalaallit aquttuat Peter Berthelsen unammineq tamaat annaassilluaqattaareerluni ugguaatigeqisaminik unamminerup naammassinissaanut sekundit qulingiluaannanngortut isertitsiffigineqarpoq.
Unammiuaarnerit aallartinneranni Danmark Norgemut ajorsarpoq ullumilu Sverige unammissallugu. Unnugu Sverige Danmarkimut ajugaassappat kalaallit inissisimallualissapput.
Aatsaavissuarmi Nordic Cupimi kalaallit ujaminnannissamut periarfissaqalersussaapput. Tamannali iluatsissappat pinngitsooratik arfininngorpat Danmark ajugaaffigisariaqarpaat.
Futsalimi siornatigut kalaallit Danmark ajugaaffigereernikuuaat. Danmarkimut unammineq arfininngorpat KNR-TV-mi nalunaaqutaq ataatsimut toqqaannartumik aallakaatinneqassaaq.