Futsal: Kalaallit Nordic Cupimi sisamaattut inissipput
Futsalimi Nordic Cup siumut naatsorsoruminaatsumik ingerlavoq.
Naligiiginnartut unamminernilu siuliini ajorsangaatsiareerlutik ajugaasut unammiuaarnernut arfininngornermi naammassisunut pissanganarsaataapput.
Pointit isertinneqartullu takutippaat arfininngormat kalaallit Danmarkillu unammineranni ajugaasut bronzennattuussasut.
Tassani aamma kalaallit aallartilluarput 4-4-mullu naligiilernissap tungaanut ingerlalluarlutik. Tassanngaanniilli Danmark siuariartorpoq 7-4-millu ajugaammat kisitsisit taakku tikkuusseqqissaanngilat unamminerup qanoq pissanganartigisimaneranut.
Sverige - Grønland 7-1
Norge - Danmark 5-1
Sverige - Danmark 2-2
Norge - Grønland 2-2
Sverige - Norge 2-3
Danmark - Grønland 7-4
1. Norge
2. Sverige
3. Danmark
4. Kalaallit Nunaat
- Nunani allani unammigaangatta malugisarparput unammisartut unamminertigut misilittagaqarnerusut, sungiusaasoq Lôke Svane KNR-mut oqarpoq.
Taamatullu oqaaseqarnera iligiinni anføreriusumit ilalerneqarpoq.
- Nunatsinni ukiumut ataasiaannarluta pissartanngornilluta unammisarpugut unammisakkavulli ukioq naallugu ligami unamminerpassuarnik aqqusaagaqartarput, kalaallit anføreriat Lars-Erik Reimer KNR-mut oqarpoq.
- Ingerlariaqqissagutta nutaamik eqqarsartariaqalerpugut. Ukiumut sapaatip akunnerinnaa unammisarneq naammanngilaq, oqarpoq.
Kalaallit futsalimi nunanut allanut unammisartut misiligartuunit inuusuttunillu ilaatigut Danmarkimi Sverigemilu unammisartuunermik misiliisunit akuugaapput.
- Arsartuvut tulluusimaarutigaakka aamma ineriartoqqinnissamut periarfissaqarluarput. Neriuppunga amerlanerit Nunatta avataanut misiliiartortalerumaartut taamalu unamminertigut misilittagaqarnerulerlutik, Lôke Svane oqarpoq.
Kalaallit sisamaattut inissipput Norgelu aaqqissuisunut Sverigemeersunut ajugaalluni pissartanngorpoq.
