Futsal GM pissaaq coronamut ernumasoqaraluartoq
Nivissat U-18-it futsalimi GM-qarnissaat tallimanngornermi Nuummi aallartissaaq. Unammiuaarnerit pissapput naak Kalaallit Nunaanni timersoqatigiit kattuffiat GIF sisamanngornermi nalunaaraluartoq illup iluani silamilu timersornerit tamarmik unitsikkallarneqarnissaat kaammattuutigalugu.
- Nivissat U-18-it futsalimi GM-qarnissaat ingerlatiinnassallugu aalajangerpugut avataaniit peqataasussat tikereermata. Unamminerit tamarmik isiginnaartoqarani pissapput. Aamma maluginiagassaavoq iligiit avataaniit peqataasut ataasiinnaammata tassalu I-69 Ilulissaneersoq, Lars Jørgen Petersen KAK-meersoq KNR-mut oqarpoq.
AAMMA ATUARUK Ataatsimiititaliarsuaq: Inuit pingasut coronavirusimik tunillatsissimanngillat
- Unamminerni timi atorlugu aportoqartarpoq aammalu arsaqataasut tamarmik arsaq ataaseq attoqattaartarlugu. Tamanna ernumananngila?
- Unamminerni timikkut atortarneq avaqqukkuminaappoq. Aamma unammersuarnerit nalaanni paareqatigiittoqarumaarpoq. Peqqussutigaarput arsartut, sungiusaasut, dommerit allatigullu iligiinnut attuumassuteqartut unamminerni peqataasassanngitsut quersorunik arlaatigulluunniit peqqiilliorunik, Lars Jørgen Petersen oqarpoq.
AAMMA ATUARUK Kalaallit Nunaanni Timersoqatigiit Kattuffiata timersornikkut aaqqissuussat tamaasa atorunnaarallarteqqugai
Eqqiluisaarluarneq
Nivissat U-18-it futsalimi GM-qarnissaat aalajangiunneqarpoq Nuummi illorsuit timersortarfiit aqutsisui qanimut attaveqarfigisareerlugit.
- GM-rtoqarnissaa akueraarput pissartanngorniunnerit taamaatiinnarnissaannut periarfissaq sivikimmat aammalu avataaniit peqataasussat Nuummut tikereermata. Eqqiluisaarnissaq eqqarsaatigalugu aamma sukaterivugut isertarfiit eqqaanni timersortarfimmilu sumiiffinni arlalinni assannut spritinik inissiilluta, Nuummi illorsuarmi timersortarfimmi pisortaq Jens Kristian Berthelsen oqarpoq.
Arsaattartut kattuffiat aalajangerpoq upernaap sinneranut pisussat tamarmik piffissaligaanngitsumut kinguartinneqartut nualluussuup coronap tuniluunnissaa pinaveersimatinniarlugu.
Timersortarfiit aamma matoorarput. Nuummi illorsuaq timersortarfik aamma Inussivik ulluni 14-ni tulliuttuni matoqqassapput – nivissat U-18-it GM-qarnissaat eqqaassanngikkaanni. Ilulissat timersortarfiat sisamanngornermi unnukkut aamma piffissaligaanngitsumik matoqqagallartinneqalerpoq.
