Fukushimami ikummatissat radioaktiviusut piiarneqalersut
Japanimi nuna immap naqqani 2011-mi marsip ulluisa aqqarnanni sajorujussuarmat tassaarsuaqarpoq, atomimillu nukissiorfik Fukushimamiittoq eqqorneqartunut ilaavoq. Illoqarfiit illoqarfeeqqallu 260-init amerlanerusut aamma eqqorneqarput.
Fukushimami atomimik nukissiorfimmi sulisut ikummatissanik radioaktiviusunik 566-inik piiaalersimasut Tepco nalunaarutigaa, ikummatissat uranitallit plutoniummitallillu piiarneqalerlutik.
Taama piiaasoqarnera pingaaruteqartupilussuuvoq.
Nunammi sajoqqissinnaanissaata aarlerinartuunera eqqarsaatigalugu ikummatissat uraniusut plutoniummiusullu peerneqarnissaat pingaaruteqarpoq, taamanikkut 2011-mi pisumik ajornerusumik pisoqarnissaa pinaveersaartinniarneqarpoq.
Ikummatissat pineqartut ukiut tulliuttut marluk ingerlaneranni piiaarneqarnissaat ilimanartoq Tepcop oqaatigaa. Ikummatissat atomip nukinganik atortussanngortitsivimmiittut piiarneqarnissaat taava tullinnguutissaaq, suliarlu tamanna ulorianarluinnarsinnaalluni.
Fukushimami atomimik nukissiorfimmi eqqaanilu saliisoqarnissaa ukiunik 40-nik sivisussuseqarsinnaanissaa siusinnerusukkut ilimagineqareerpoq.
Japanimi nuna taamanikkut 2011-mi sajorujussuarmat tassaarsuaqarmallu inuit 15.000-it 20.000-illu akornanni ajunaarput, inuillu 100.000-init amerlanerusut eqqorneqarput, angerlarsimaffimminniit qimagussorneqarlutik, qinngornernik radioaktiviusunik eqqorneqannginnissaat pillugu qimagussorneqarlutik.