VIDEO Franskit ministiata ajornartorsiut puisit amiinut tunngasoq ilisimasimanngikkaa
![](/sites/default/files/styles/image_934x467/public/oembed_thumbnails/2022-12/dYD5mEvnpDzYUjac_ca3dMgNd6nU-eavye68m7xN-eE.jpg?itok=TW4ht6iF)
Laurent Fabius nunanut allanut naalakkersuisoq Vittus Qujakitsoq aamma danskit nunanut allanut ministeriat Martin Lidegaard Ilulissanut tikeraaqatigai, tassanilu sila pissusiata allanngoriartornera oqaluuseralunikku. Vittus Qujakitsulli periarfissani atorluarlugu EU-p peqqussutaa puisinniarnermut tunngasoq sukateriffigineqarnissaanut siunnersuut qanoq piniartunut ajoqutaatigissanersoq nassuiaasimavoq.
- Unneqqarillunga oqaatigissavara ajornartorsiut taanna ilisimaqqissaarsimannginnakku. Maannali erseqqilluinnartumik ilisimatinneqarpunga.
- Aaqqiissutissamik tamatta inooqataaffigisinnaasatsinnik nassaassinnaavugut. Oqarsinnaanngilangali qanorpiaq. Maannali ajornartorsiut takusinnaalerpara, Laurent Fabius oqarpoq.
Aamma atuaruk VIDEO Franskit ministeriat: Ilulissaniinnera pingaaruteqarluinnarpoq
Danskit nunanut allanut ministeriata upperaa franskit ministeriat peqatigalugu EU-mi politikkerinut paasititsiniaaneq iluatsissinnaasoq.
Siunertaq tassaavoq Kalaallit Nunaat puisit amiinik qanorsuaq nioqquteqarsinnaalernissaa. Tamannali ajornakusuussaaq. Tassami nunarpassuit tamanna akerleraat, Martin Lidegaard oqarpoq.
- Nunalli angisuut Frankrigisut ittut peqatigalugit anguniagarput angusinnaavarput. Kalaallit Nunaata Danmarkillu puisit amiinik niuernerusinnaanissamut unammilligassai imaannaanngillat. Taamaammallu pingaaruteqarpoq nukittuumik peqateqarnissaq, Martin LIdegaard oqarpoq.