2026-p aallartinnerani franskit aallartitaqarfiata ammarnissaa aamma aningaasaqarneq, aatsitassarsiorneq, ilisimatusarneq silallu pissusiata allanngoriartornera pillugit suleqatigiinnerup nukittorsarnissaa.

Nunanut allanut tunngasunut ilisimatusarnermullu naalakkersuisup Vivian Motzfeldtip (S) Frankrigillu nunanut allanut tunngasunut ministeriata Jean-Noël Barrotip ullumi tusagassiortunik katersortitsineranni tamakku saqqummiunneqarput.

- Suleqatigiinnerup piviusunngortinneqarnissaa qulakkeerniarlugu aappaagu ukiup aallartilaarnerani aallartitaqarfik ammarneqassaaq. Aallartitakka aallartitaqarfiup ammarnissaanut piareersaalerumaarput, Frankrigip nunanut allanut tunngasunut ministeria oqarpoq.

Tamatuma saniatigut franskit kalaallillu suleqatigiinnermut ataatsimiititaliaat pilersinneqassaaq, nunat taakku marluk suleqatigiinneranni angusaqarluarnissamik qulakkeerinnittussaq.

Nunanut allanut tunngasunut naalakkersuisoq ministerilu taakku marluk naalakkersuisullu siulittaasuata Jens-Frederik Nielsenip (D) ataatsimeeqatigiinnerisa kinguninngua Hans Egedep illuani Nuummiittumi tusagassiortunik katersortitsisoqarpoq.

Ataatsimiinnermi aamma Danmarkimi nunanut allanut tunngasunut ministereqarfimmi pisortaq aamma Kalaallit Nunaannut tunngasunut siunnersorti, kiisalu Frankrigip Danmarkimi aallartitaa najuupput.

- Nunarsuarmi pissutsit eqqissiviilliorneruleriartortillugit nunatta nunanik uagutsitut naleqartitaqartunik suleqateqarnissaa pingaaruteqarluinnarpoq, Vivian Motzfeldtip Jean-Noël Barrotillu tusagassiortunut katersuutsitsinerini Vivian Motzfeldt oqarpoq.

Naalakkersuisoq ministerilu taakku marluk maajimi Parisimi ataatsimeereerput, tassanilu franskit nunanut allanut tunngasunut ministeriat nunatsinnut qaaqqusaavoq.

Ippassaq unnukkut Frankrigip nunanut allanut tunngasunut ministeria aallartitaalu Nuummi mittarfimmut mipput. Tamatuma kingorna franskit sakkutuuisa umiarsuaat Nuummi tulassimasoq pulaarpaat. Assi © : KNR/Johansinnguaq Olsen

Macronip juunimi tikeraarnerani franskit aallartitaqarfiata ammarneqarnissaa nalunaarutigineqarpoq.

- Ukiumi nunatsinnut ilungersunartorsiorfiusumi Frankrigip nunatsinnik illersuiumanini erseqqissumik takutippaa, tamannalu qujamasuutigalugu oqariartuutigaarput, Vivian Motzfeldt (S) oqarpoq.

USA qanoq inissisimaffeqarpa?

Frankrigimi ministerip sapaatip-akunnerata naanerani tikeraarnera nunat tamalaat akornanni pissutsit ilungersunartorsiorfiusut nalaanni pivoq. 

NATO, EU Danmarkilu niuerneq, illersornissaq isumannaallisaanerlu pillugit qaninnerusumik suleqatigiilerput.

Tassanilu Issittoq nunarpullu qitiulerput.

Minnerunngitsumik USA-p præsidentiata ukioq manna siusinnerusukkut nunatta pisiarinissaanik aqutsinissaanillu kissaateqarnini uteqattaallarmagu.

Nunanut allanut tunngasunut naalakkersuisoq apriilimi naalakkersuisunngortoqarmalli diplomatit politikerillu assigiinngitsut ilassiniarlugit Europami angalasarpoq.

Ullumikkut tusagassiortunik katersortitsinermi aamma USA qanoq inissisimaffeqarnersoq apeqqutigineqarpoq.

 Vivian, sapaatip-akunnerata siuliani Tysklandip illersornissamut ministeriata tullia ullumilu Frankrigip nunanut allanut tunngasunut ministeria ataatsimeeqatigisimavatit. USA suleqatigiinni taakkunani qanoq inissisimava? KNR aperivoq.

- Siullertut nunanik issittumiittunik suleqateqarnitsinnik attassinerput aalajangiusimavarput, Vivian Motzfeldtip akissuteqarnini aallartillugu taama oqarpoq.

- Taassuma avataatigut NATO-mi nunat issittumiinngitsut peqataanissaannut tikilluaqquagut. Tamanna takuneqarsinnaalereerpoq, soorlu tyskit najuunnerini maannalu franskit tikeraarnerini. Frankrigimiulli kisimik suleqataanngillat – sammisat angisuut pingaaruteqartullu annertunerungaartut pineqarput, taanna oqarpoq.

Nunatta USA-mik suleqateqarnissani suli soqutigaa, nunat tamalaalli inatsisaat namminerlu aalajangiisinnaatitaaneq atuuttariaqartut, Vivian Motzfeldt (S) oqarpoq. Assi © : Birgitte Kjeldsen

Tusagassiortunik katersortitsinerup kingorna DR-imi tusagassiortup nunatta USA-llu akornanni pissutsit qanoq innersut apeqqutigaa.

- USA-mik niuernikkut suleqateqarnitsinnik ineriartortsiumanerput aalajangiusimavarput, tamannali nunat tamalaat inatsisaat inuillu pisinnaatitaaffii naapertorlugit pissaaq.

USA-mit tikeraartoqassamaarpa? DR-imi tusagassiortoq aperivoq.

- USA-p nunattalu ataatsimeeqatigiinnissaat sulissutigaarput, kisianni qaqugukkut sumilu tamanna pissanersoq oqaatigissallugu siusippallaarpoq.