PAN AM 2018 Aningaasartuutit suli nalornissutigineqartut
Arsartartut qassit peqataassanersut suli nalornissutigineqarmat, Amerikap nunavittaani assammik arsarluni pissartanngorniunnissami PAN AM 2018-mi ataqatigiissaarisoq Poul Petersen oqarpoq
PAN AM 2018-mi aningaasartuutit ataqatigiissarneqarnissaannut Poul Petersen ulapippoq.
PAN AM- 2018-mi pissartanngorniunnissami 1,5 million kr-nik amigartooruteqassaaq, aningaasaqarnermullu nalornissutit arlaqarput
- Arsartartoqatigiit pingasut peqataanissaminnut peqataannginnissamulluunniit nalunaarnissaat utaqqineqarpoq, Poul Petersen taama oqarpoq.
USA, Mexico aamma Puerto Rico PANAM-imi peqataassanersut suli qulakkeerneqanngilaq.
Natersuit Franrkigemit assartorneqassapput
Pissartanngorniunnissamut nunat tamat piumasaqaataannut ilavoq, unammiffiussussami natersuit aalajangersimasut atorneqarnissaat tamannalu pissartanngorniunnerup akisunerunissaanut sunniuteqassaaq.
- Pissartanngorniunnermi atorneqartussat natersuit pisiarineqarsimasut attartukkallu, Frankrigemit tikiunneqartussaapput taama Poul Petersen oqarpoq.
Taakkualu matussuseqarnissaannut aningaasaliisinnaasunik pissarsiortoqarpoq.
AAMMA ATUARUK PAN AM kalaallit assammik arsaattarnerannut akisusinnaasoq
- Kalaallit Nunaanni Danmarkimi aamma Amerika kujallermi, nunanit unammeqataasussanit tapiissutissanik pissarsiorpugut, Amerikap Nunavittaani Assamik Arsarluni pissartanngorniunnissami PAN AM 2018-mi ataqatigiissaarisoq Poul Petersen taama oqarpoq.
AAMMA ATUARUK Naalakkersuisut Pan Am-ip nunatsinni aaqqissuunneqarnissaanut aningaasaliiniartut
Aningaasartuutit tamakkerlugit matussuseqanngikkaluartut, Amerikap Nunavittaani Assammik Arsarluni pissartanngorniunnerit PAN AM 2018 ingerlanneqassasut, ataqatigiissaarisoq Poul Petersen oqarpoq.
GHF akilisinnaajunnarsinnaanera pinngitsoortinneqarsinnavoq
Kalaallit Nunaanni Assammik Arsartartut Kattufia akiliisinnaajunnaarsinnaanersoq, suli maannakkut ilisimaneqanngilaq, 2017-mut naatsorsuutit kattuffimmi siulersuisut 10 aamma 11 marts ataatsimiippata saqqummiunneqartussaammata, Kalaallit Nunaanni Assammik Arsartartut Katuffianni siulitaasoq Jørgen Isak Olsen KNR-mut taama oqarpoq.