PAN AM kalaallit assammik arsaattarnerannut akisusinnaasoq
Aningaasassarsiornermut tunngatillugu killiffipput tassaagunarpoq oqartariaqalerluta GHF-ip siunissami ingerlanneqarneranut sunniuteqartussanngortoq. Christian Kjeldsen taama oqarpoq.
Allatut oqaatigalugu, pissartanngorniunnerit ingerlanneqarnissaannut aningaasat pisariaqartut tamakkerlugit aningaasaliisut oqartussallu akornanni pissarsiarineqarsinnaanissaat piviusorsiorunnaarpoq.
AAMMA ATUARUK Grønlandsbanken PANAM2018-imut guldsponsorinngortoq
- Najukkami suliffeqarfiit assigiinngitsutigut tapersersuinissartik pikkoriffigisupilussuuaat, aningaasatigulli annertuumik tapersersuisussanik pissarsiniarneq ajornakusoortupilussuuvoq, tamannalu Nunatsinni arlaatigut pisoqassagaangat suliffeqarfiit taakkorpiaat tapersersuitinniartarnerannut aamma attuumassuteqarpoq.
Pissartanngorniunnerit qanoq amigartooruteqarfiutigissanersut Christian Kjeldsen oqaatigisinnaanngikkallarpaa, naliliinerali naapertorlugu missingersuutit iluatsinneqassappata 3 millionit koruunit maannakkorpiaq amigaatigineqarput.
- Missingersuutit pillugit suliaqarpugut, aamma pisoqaannavippoq - aamma nunani tamalaani kattuffinnut tunngatillugu - pissutsit ilaat allanngorarput, sumulli ingerlasoqarnissaa nalunartuuvoq. Missingersuutivut naleqqussaqqammerpagut, 3 millionit koruunillu inulaarlugit amigaatigivagut.
Kalaallit Nunaanni Assammik Arsartartut Kattuffiata pissartanngorniunnernut 1,5 millionit koruuninik tapiiffigeqqinneqarnissamik qinnuteqaataa Kommuneqarfik Sermersuup kommunalbestyrelsiani ullumi oqaluuserineqassaaq.
AAMMA ATUARUK PANAM UNIBREWilu aningaasanik tapersiinissamik isumaqatigiissuteqartut
Kommunalbestyrelsip immikkut tapersiinissaq akuerissappagu missingersuutini amigartoorutissat millionit koruunit affaanik annikillineqassapput.
Kommunalbestyrelsimullu saqqummiussissummi atuarneqarsinnaavoq PANAM-ip missingersuutaani aningaasartuutaanerpaasussat tassaasut Amerika Qiterlermit peqataasussat Nunatsinnut angalanissaat. Missingersuutinit tamakkiisunit 15 millionit koruuniusunit tamatumunngaannaq aningaasartuutigineqartussat 7 millionit koruunit tungaannoorput.
Christian Kjeldsenillu oqaatigaa suliniutip immikkoortua taanna naammassineqalersoq:
- Timmisartuussineq Panama Citymit aallartissaaq, Canadamullu aqqusaariarlutik Kangerlussualiassapput, aqqullu taanna atorlugu aamma angerlassallutik, Christian Kjeldsen oqarpoq.
