Illersornissamut ministeri: Kalaallit sapinngisamik amerlanerpaat sakkutuunngorniassapput
Nunatsinni inuusuttut Kangerlussuarmi ukiuni aggersuni sakkutuunngorniarsinnaanngussapput.
Isumaqatigiissutissami Folketingimi amerlanerussuteqartut sisamanngornermi saqqummiussaanni tamanna allaqqavoq.
Kalaallit inuusuttorpassuit nunaminni sakkutuujorusussasut, danskit illersornissamut ministeriat (S) neriuppoq.
1,5 milliardit koruuninik Issittumi nakkutilliinerunissamut aningaasaliineq
Issittumi nakkutilliinermut nutaamik isumaqatigiissutissaliortoqareerpoq.
Katillutik 1,5 milliardit koruunit nakkutilliinermut atussapput.
Taakkunannga 750 millionit koruunit droninik marlunnik Kalaallit Nunaata ilaani nakkutilliissutissanik pisinermut taakkuninngalu ingerlatsinermut atussapput.
Partiit uku illersornissaq pillugu isumaqatigiissutissaliortuupput: Socialdemokratit, Venstre, Konservative, Liberal Alliance, Radikale Venstre aamma Dansk Folkeparti.
Folketingimi ilaasortat nunanit avannarlerneersut isumaqatigiissutissalioqataanngillat. Naalakkersuisulli isumaqatigiissutissalioqataasimasut, illersornissamut ministereqarfik ilisimatitsivoq.
- Sapinngisamik amerlanerpaanik sakkutuunngorniaqassappat iluatsitsilluarnerusorissavara. Isumaqarpunga 15-inik sakkutuunngorniaqarneq aallartinissaataasinnaasoq. Amerlanerusunilli sakkutuunngorniaqassappat uanga taakkununnga itigartitsisuunavianngilanga, taanna KNR-imut oqarpoq.
Sakkutuunngorniarfissarli qanorpiaq aaqqissugaassanersoq, Namminersorlutik Oqartussat namminneq aalajangigassaraat.
Issittumi Sakkutooqarfiup kalaaleqarnerulernissaa anguniagaasoq
Kalaallit Nunaanni sakkutooqarfeqalissasoq, ingammik Folketingimi IA-mit ukiorpassuarni kissaataavoq.
Folketingimi ilaasortat nunanit avannarlerneersut isumaqatigiinniaqataanngillat, Naalakkersuisulli isumaqatigiinniaqataallutik.
Illersornissaqarfik Nuummi 2018-imi sakkutuunngorniartitserngaarpoq, illoqarfinnilu ilinniarfeqarfiusuni allani sisamani tassa Sisimiuni, Aasianni Qaqortumilu 2019-imi aamma taamaaliorluni.
AAMMA ATUARUK Kalaallit Nunaanni nakkutilliinermut isumaqatigiissut piareertoq
Sakkutuunngorniartitsinerit Illersornissaqarfiup kalaallinik inuusuttunik sakkutooqarnerulernissaa siunertaraat.
2019-imi sakkutuunngorniarnissamut misilitsittuni 58-iusuni 21-t piukkussimagitik taakkunanngalu 15-it isumaqatigiissusioqatigisimagitik, Illersornissaqarfik ilisimatitsivoq.
Siorna sakkutuunngorniartitsinissaagaluit, aaqqissuussat allarpassuit assigalugit, coronap ajornartoortitsinera peqqutaalluni taamaatipput.
Issittumi Sakkutooqarfiup kalaaleqarnerulernissaa anguniagaavoq. Taassuma Nuummi qullersaqarfiani sulisut 40-t missiliorpaat. Taannalu Kalaallit Nunaat Issittorlu pillugit ilisimasaqarluartunik sulisoqarusuppoq.
AAMMA ATUARUK Illersornissaq pillugu isumaqatigiissut nutaaq: Nunarput nammineq illersornissamik ilinniarfeqalissasoq
- Taakkua pillugit ilisimasaqarluarnissaq pingaaruteqaqaaq. Aamma sakkutuutut soorlu unioqqutitsilluni imarsiortunik, nalunaarsuutinik taakkuninngalu atorunnaarsitsinermik alapernaarsuinermi aammali inunnik annaassiniarnermi taavalu silap pissusianik avatangiisinillu nakkutiginninnermi, Trine Bramsen oqarpoq nangillunilu:
- Taamaammat kalaaleqarneruleqqunaqaaq.
Danskit inuusuttut qinnuteqarsinnaanersut nalunartoq
Danskit inuusuttut Kangerlussuarmi sakkutuunngorniarfeqalissappat tassunga aamma qinnuteqarsinnaalerumaarnersut, illersornissamut ministeri aperineqarami ima akivoq:
- Tamanna tunngaviatigut siunertaanngilaq. Kalaallilli kissaatigippassuk misissorusupparput. Danskinik inuusuttunik tassani sakkutuunngorniartoqarneq iluaqutitaqassanersoq kalaallit namminneq naliligassaraat.
Kangerlussuarmi sakkutuunngorniarfissamut aningaasaliissutit, 2023 ilanngullugu atugassat, 50 millionit koruuniupput. Sakkutuunngorniarfissamullu qaqugumiit qinnuteqartoqarsinnaanngussanersoq suli ilisimaneqanngilaq.
