Ippassaq qinersinerup inernerinut apeqqutit arlallit suli akissutissarsineqanngillat, Danmarkimimi saamerliit talerperliillu 90-inik amerlanerussuteqarsinnaapput, taamaattumillu nunatsinni qinigaasut Danmarkimilu qinigaasut suleqatigiinnissamut tunngatillugu qanoq isumaqatiginninniarumaarnerat nalunarpoq.

Aammali allanngortoqarpoq. Siumut pilersinneqaramili Folketingimut aatsaat qinigaatitaqanngilaq.

Naalakkersuisoqatigiinniinnerat pissutaasinnaasoq, Inatsisartunut ilaasortaasimasoq tusagassiortutullu ilinniagalik Sofia Geisler isumaqarpoq.

- Takusinnaavarput Siumup, aamma namminneq oqariartuutigisaat eqqarsaatigalugu, naalakkersuisoqataasimanertik akisunaarsimarpasippaat, Sofia Geisler oqarpoq.

Partiit naalakkersuisoqatigiinniittut kinguariartarnerat takornartaanngilaq. Aamma Danmarkimi qinigaaffimmi qaangiuttumi naalakkersuisoqatigiinniittut Socialdemokratiet Venstrelu kinguariarsimasut Sofia Geislerip erseqqissaatigaa.

Kina ministeriuninngussanersoq suli nalunartoq

Siumut aamma Inatsisartunut siorna qinersinermi kinguariarujussuarpoq. Naleraq illuatungaani qinersinerni kingullerni marlunni siuariarujussuarpoq.

- Apeqqutaaginnalerpoq, Inatsisartunut qinersinissap tungaanut tamanna qanoq piumaarnersoq qanorlu isikkoqarumaarnersoq, taanna oqarpoq.

Aamma Danmarkimi partiit annerit naalakkersuisoqatigiinniissimasut marluk Socialdemokratiet Venstrelu kinguariarput. 

Partiinit saamerlernit 84-it qinerneqarput, partiiniillu talerperlerniit 77-it qinerneqarlutik. 90-init tunuliaquteqaraanni Folketingimi amerlanerussuteqartoqassaaq.

Taamaammat kina ministeriuninngussanersoq maanna nalunarpoq. Aamma nunatsinnit qinigaasut marluk, Naja Nathanielsen Qarsoq Høegh-Damilu qanoq sunniuteqarsinnaatigisut maannakkoqqinnaaq takujuminaalaarsinnaasoq, Sofia Geisler isumaqarpoq.

Danskit naalakkersuisorilerumaagai apeqqutaassasut

- Pissutigalugu saamerliit talerperliillu taakkua nikinganerat annertoorujussuunnginnami. Taamaattumillu Lars Løkke Rasmussenip partiiata Moderaternep taakkua 14-inik ilaasortaatitaqalersut aalajangertussaassagunarpaat, kina ministeriunerussanersoq, Sofie Geisler oqarpoq.

Danmarkimi partiit talerperliit arlallit Venstrep siulittaasua, Troels Lund Poulsen, ministeriuninngortikkusuppaat. Partiilli saamerliit arlallit Mette Frederiksen ministeriuninngortikkusuppaat.

Moderaternilli siulittaasuat Lars Løkke Rasmussen naalakkersuisoqatigiiliornissamut isumaqatigiinniarnernut siuttutut imminut piukkuppoq. Taakkulu saamerlernut talerperlernullu suleqatiserinnikkaluarluni partiit siuttui arlallit ministeriunerusimasumik suleqateqarusunngillat.

Qanoq amerlanerussuteqartoqalissanersoq naalakkersuisoqatigiinngortussalluunniit Folketingimi ikorfartorteqartariaqassanersut maanna nalunarpoq.

- Qallunaat Nunaanni Kalaallit Nunaannilu politikkikkut inissisimanermi erseqqarluttutut isikkullit arlaqarpasipput. Patajaatsumik ukiuni tullerni qanoq ingerlanissaanut toqqammavissaq qanoq ikkumaarnersoq suli nalunarpoq, Sofie Geisler oqarpoq.