Danmarkimi folketingimut qinersinerup erseqqissumik inerneqannginnera nunarsuaq tamakkerlugu tusagassiuutinit allaaserineqartoq

Danmarkimi folketingimut qinersineq nunarsuaq tamakkerlugu nittartakkatigut tusagassiuutini arlallilinni pingasunngornermi qulequttatut pingaarnertut saqqummiunneqarpoq.

Ilaatigut BBC-mit, The Guardianimit, CNN-imit, New York Timesimit, Norgemi NRK-mit Sverigemilu SVT-mit.

CNN allappoq qinersineq "erseqqissumik inerneqanngitsoq“.

Qineqqusaarnermi "USA-p præsidentiata Donald Trumpip Kalaallit Nunaannut anguniagai pillugit ajornartoornerup (Mette Frederiksenimit aaqq.) qanoq iliuuseqarfigineqarnera pinnagu, ulluinnarni ajornartorsiutit pingaarnerutinneqartut", tusagassiuut allappoq.

BBC-ip allaaserinninnera naapertorlugu, "Socialdemokraterne ukiut 100-t sinnerlugit qinersisarnerni aatsaat taama qinersisikitsigaat“ taamaattorli isumaqarput Mette Frederiksen "pingajussaannik ministeriuninngornissaminut suli periarfissaqartoq“.

- Danmarkili naalakkersuisooqatigiinnit nalinginnaasumik aqunneqartarmat isumaqatigiinniarnerit imaannaanngitsut, ullualunni sapaatip-akunnialunnilluunniit sivisussuseqarsinnaasut tullinnguupput, taakkua allaaserinnipput.

Danmarkip ministeriunissaata tullia 

Nunanut allanut ministerip Moderaternellu siulittaasuat Lars Løkke Rasmussenip (M), naalakkersuisunngortussat qanoq inissitsititerneqarnissaata aalajangerneqarnissaannut pingaaruteqarnera NRK-mit aamma SVT-mit maluginiarneqarpoq.

"Danmarkimi kina ministeriuninngussanersoq aalajangersinnaavaa“ SVT-mi qulequtaavoq.

Lars Løkke Rasmussen aamma Moderaterne “aaqqiissutissatut” inissisimassasut, naalakkersuisunngortussallu qanoq inissinnissaannik aalajangiisuusinnaasut, tusagassiuut allappoq.

Moderaterne folketingimut marlunngornermi qinersinermi 7,7 procentinit taaguunneqarput 14-inillu ilaasortaatitaqalerlutik.

Ilaasortaatitat 14-it taakkua, naalakkersuisunngortitsinissamut aalajangiisuusinnaapput, saamerliit talerperliillu partii taanna peqatigitinnagu amerlanerussuteqalersinnaannginnamik.

Inernerit naapertorlugit saamerliit 84-inik ilaasortaatitaqalerput talerperlerneersullu 77-inik ilaasortaatitaqalerlutik.

/ritzau/