Siumut Folketingimut siullerpaamik qinigaatitaqanngitsoq

Partiip siulittaasua, Aleqa Hammond unnummut ernumarpasikkuni tamanna Siumup aatsaat siullermeerluni Folketingimut qinigaatitaqannginneranik pissuteqarpoq.

Partiimit allamut nuuttoqarpoq – soorlu Aki-Matilda Høegh-Dam Siumumit anilluni Naleqqamut ukioq ataaseq matuma siorna ilaasortanngorpoq. Aleqa Hammondilu Folketingimi ilaasortaanermini akiliumminik atornerluinini pissutigalugu Siumumit 2016-imi anisitaasoq attaviitsutut ingerlaqqinnikuuvoq.

Siumumeersumik folketingimi maanna ilaasortanngortoqaranilu Christiansborgimi allaffittaartoqanngilaq. Inuit Ataqatigiinniilli Naja Nathanielsen aamma Naleqqamit Qarsoq Høegh-Dam qinigaapput.

Takussimi unnussioqatigiittut

Siumut ullumi qinersinermi 16,4 procentinit taaguunneqarpoq. Tassa taasisut 3.515-it. Tamanna partiimut annaasaqarneruvoq, partiimi folketingimut ukiut sisamat matuma siorna 37,7 procentinit taaguunneqarluni taaguunneqarnerpaavoq.

Tamannali Siumumeersut KNR-ip Nuummi Takussimi unnussioqatigiittut alakkarmagit aliasuutigerpasinngilaat. Siumut qineqqusaarnerup nalaani naalakkersusioqatigiinnit aamma anivoq, taama pisoqareermat nunanut allanut naalakkersuisoq, Vivian Motzfeldt aamma Inatsisartut siulittaasuat, Kim Kielsen Siumumi ukiuni 41-ni ilaasortaasoq partiiminnit anipput.

- Taama killiffeqarnerput uggornarpoq

Takussimili unnussioqatigiittut pingasunngornermi unnuap-qeqqata eqqaani nipaannerusut, Sermitsiaq.ag allappoq.

- Maanna taamannak killiffeqarnerput uggornarpoq, Doris J. Jense Sermitsiaq.ag-mut oqarpoq.

- Ilaasortatsinnik pingaarutilinnik marlunnik annaasaqaqqammernerput naalakkersuisoqatigiinniillu piffissaanngitsumi aniniarluta aalajangernerput pissutaaqataagunarput, taanna naliliivoq.

Siumut folketingimut arfinilinnik qinigassanngortitaqarpoq. Ineqi Kielsen 1.142-nit taaguunneqarpoq, Doris J. Jensen 820-nit. Naalakkersuisuusimasorlu Ane Lone Bagger 508-nit taaguunneqarluni.

Qinersinermi inernerit tamarmik valg.gl-imi takusinnaavatit.