Nobelip Naalagaaffiit Peqatigiit tamat inuussutissaqarnissaannik pilersaarusiortui nersornaaserniarai

Naalagaaffiit Peqatigiit tamat inuussutissaqarnissaannik pilersaarusiortui, World Food Programme, WFP, Nobelip eqqissinermut nersornaasiuttagaanik 2020-mi tunineqassapput. Nobelip Norgemi ataatsimiititaliaa taama nalunaaruteqarpoq.

Nerisassat sorsunnerup sakkuaattoqarnerulli nalaani sakkutut atorneqannginnnissaannut World Food Programmep ilungersuuteqartuarnera nersorniarneqartoq nalunaarutigineqarpoq.

World Food Programmep Nobelip eqqissinermut nersornaasiuttagaanik ukioq manna tunineqarnissaa ilimagineqanngikkaluarpoq.

Naalagaaffiit Peqatiigiit ataanni suleqatigiiffiup allap, Naalagaaffiit Peqatigiit peqqissuunissaq pillugu suleqatigiiffiata WHO-p nersornaaserneqarnissaa ilimagineqartunut ilaagaluarpoq, tassami Covid-19-ip nunarsuaq tamakkerlugu tuniluunnerani suliassaasa pingaarnerit ilaanniimmat.

Svenskeq silap pissusia pillugu sukataarutiginnittoq, Greta Thunberg, New Zealandillu ministeriunerunera, Jacinda Ardern, nersornaaserneqartussatut piukkunneqartunut ilaapput.

AAMMA ATUARUK Greta Thunberg ukioq ataaseq atuanngiffeqareerluni atualeqqittoq

WFP Romimi qullersaqarfeqarpoq. Nunani 88-it missaanniittuni Inuit 97 millionit qullersaqarfimmit ukiumut ikiorneqartarput. Nunarsuarmi inuit qulingiluaagaangata ataaseq ullut tamaasa naammatsinnani nerisarpoq.

- Nunat tamalaat akornanni ersoqatigiinnissaq suleqatigiinnissarlu aatsaat taama pisariaqartigaaq, Nobelip Norgemi ataatsimiititaliaata siulittaasua, Berit Reiss-Andersen, Nobelip eqqissinermut nersornaasiuttaagaanik ukioq manna tunineqartussap nalunaarutiginerani oqarpoq.

Nersornaasiuttagaq 7 millionit koruunit missaannik aningaasartaqarpoq.

Nersornaat WFP-mut Oslop kommuniata allaffeqarfissuani decambarip ulluisa qulinganni tunniunneqassaaq.