Assi: MIO

Meeqqat Illersuisuat: FN-ip innersuussutai malinneqarlutillu nukingernartuupput

Nunatsinni meeqqat atugaat Nalaagaaffiit Peqatigiinnit ernumanartinneqarput, taamaammallu innersuussutigineqartut Meeqqat Illersuisuata tigulluarpai, aammali innersuussutaasut piviusunngortillugit iliuuseqarfigineqapallattariaqartut Aviâja Egede Lynge naliliivoq.

Naalagaaffiit Peqatigiit meeqqat pillugit ataatsimiititaliaata nunatsinni meeqqat atugaat pillugit innersuussutaat tiguneqarsimalerput.

- Meeqqat atugaat pillugit inissisimanerput assigiinngissutigut ernumanartutut Naalagaaffiit Peqatigiinninngaanniit isigineqarpoq aamma tuaviortumik nukingernartumillu iliuuseqartoqarnissaannik kissaateqarput, Meeqqat Illersuisuat Aviâja Egede Lynge taama oqarpoq.

Kalaallit Nunaat Naalagaaffiit Peqatigiinni meeqqat pisinnaatitaaffii pillugit isumaqatigiissutaanut ukioq manna misilitsippoq.

Iliuuseqarnissamillu kissaateqarneq nunatsinni maannangaaq piviusunngortinneqartariaqartoq Meeqqat Illersuisuata naqissuserpaa.

- Pisortat uani annertuumik suliassaqarput aamma inuiaqatigiittut annertuumik kivitassaqarpugut. Nukinginnartorujussuartut ukua isigisussaavagut aaqqiissutissat innersuussutigineqartut, Aviâja Egede Lynge oqarpoq.

AAMMA ATUARUK FN-ip nalunaarusiaata suli suliassaqangaatsiartoq takutippaa

Iliuuseqartoqartariaqartoq

Meeqqat atugaat pillugit innersuussutit tassanngaannartumik takkutinngillat. Tassami Namminersorlutik Oqartussat nalunaarusiaat aamma Nunatsinni meeqqat atugaat aaqqiivigineqartariaqartut pillugit MIO-p nalunaarusiaat aallaavigalugit innersuussutit suliaapput.

Meerartattalu misigisartagaat innersuussutini taaneqartut ilaat nukinginnarnerusutut Aviâja Egede Lyngep nalilerpai.

- Meeqqat assigiinngitsutigut kannguttaatsuliorfigineqartartut, kisianni aamma persuttaanermik allatigullu aamma misigisaqartartut eqqarsaatigalugit nukinginnartutut iliuuseqarfigineqartariaqarput. Aamma kommunit ersarittorujussuarmik peqquneqarput aamma nukittorsarneqarnissaat Naalagaaffiit Peqatigiinninngaanniit eeqqaaneqarpoq, Aviâja Egede Lynge oqarpoq.

Naalagaaffiit Peqatigiit meeqqat atugaat pillugit ukiut tallimakkaartumik naliliisarput, taamaattumillu maanna innersuussutigineqartut isiginngitsuusaarneqarnaveersaarnissaat pisariaqarsorineqarpoq.

- Meerartagut utaqqiteqqissinnaanngilagut, utaqqeqqissinnaanngilagut. Aamma isumaqanngilanga ukiut tallimat utaqqeqqissasugut. Isumaqarpunga suliaq maanna aallartittariaqartoq, Meeqqat Illersuisuat Aviâja Egede Lynge taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat