Randi Vestergaard Evaldsen: Timmisartukkut angalasut kisimik nammakkerneqassanngillat
- Soorunami aappaannai akiliissappata naleqqutinngissoraara. Naleqqussaasoqartariaqarpoq, atuisartummi tamanik akiissappata naleqqussorinngilara, Demokraatit siulittaasuat, Randi Vestergaard Evaldsen oqarpoq.
Takornariat nunatsinnukartarnerat ajornaannerullunilu akikinnerulernissaa mittarfinnik nutaanik pilersitsinissami ilaatigut siunertaavoq.
AAMMA ATUARUK Mittarfiit amigartoorutaat akitsuusersuinikkut aningaasalersorneqassapput
Akitsuutit akimmisaartitsisinnaasut
Demokraatilli naapertorlugit nunanut allanut aallartarnerit akitsuuserneqarneri nunatsinni takornariaqarnerulernissaanut angusaqarluarnissamut akimmisaarutaasinnaavoq.
- Taamaalilluta inuiaqatigiinni ineriartornatalu alliartortitsinavianngilagut. Oqarnittut pilersaarut killormut ingerlalersinnaavoq, Randi Vestergaard Evaldsen oqarpoq.
Randi Vestergaard Evaldensenip nunanut allanut angalasussat amigartoorutinik tamanik akiligassinnagit akiligassap ilaa nunatta karsianit - soorlu Mittarfeqarfinnit aamma kiffartuussinermit isumaqatigiissuteqarnikkut akilerneqartariaqarsoraa.
- Tassa kiffartuussinermut isumaqatigiissutit uani atorneqarsinnaapput, taamaammat pisortaninngaanniit arlaatigut tapiisinnaanissaq pissusissamisuuginnarpoq, Demokraatit siulittaasuat oqarpoq.
AAMMA ATUARUK Akit qaffannissaat atorfissaqartinngilarput
Naalakkersuisunut isumaqatiginniarneq
Siunnersuut pillugu maanna tusarniaassutigineqarpoq, siunnersuullu pillugu isumaqatiginniartoqassappat tamanna Demokraatinit ammaffigineqartoq, Randi Vestergaard Evaldsen oqarpoq.
- Siunnersuut pillugu politikikkut illuatungiliuttut peqataasimanngillat, taamaattumik partiit sinneri naalakkersuisullu isumaqatiginniarnermut atatillugu peqataatitsisoqassappat suleqataarusuppugut qilanaarlutalu, Randi Vestergaard Evaldsen oqarpoq.
Nuummi Ilulissanilu mittarfiit tallineqarlutik 2022-imi naammassineqarpata akitsuutit atulersinnissaat pilersaarutaavoq.