Air Greenland: Akit qaffannissaat atorfissaqartinngilarput
Air Greenlandip Naalakkersuisut inatsisissatut siunnersuutaat mittarfeqarfinnut tunngasoq taama isummerfigaa.
- Taamaammat oqaatigineqarsinnaavoq akitsuutissaq billetsip akia sipporutissammagu ajuusaarnartoq. Akia qaffassappat takornariat ikilissammata, Jacob Nitter Sørensen, Air Greenlandimi pisortaagallartoq oqarpoq.
AAMMA ATUARUK Mittarfiit amigartoorutaat akitsuusersuinikkut aningaasalersorneqassapput
Akitsuusersuineq pitsaanngitsumik kinguneqassaaq
Timmisartortitseqatigiiffiup ukiuni kingullerni sulinertik pitsanngorsarmassuk, Nunatsinniit Nunatsinnullu angalaneq akikinnerulersimavoq.
Air Greenlandimi angalasut amerleriarsimanerat tamatuma kinguneraa.
- Akit apparaangata naliginnaavoq inuit angalanissamut akissaqarnerulertarnerat. Tikikkusutarlu akikinnerugaangat orniginarnerulertarpoq.
Akitsuusersuineq pitsaanngitsumik kinguneqassasoq, takornarialerisuni World of Greenlandimi Ilulissaniittumi aamma qularineqanngilaq - akitsuutip qanoq annertutiginera apeqqutaalluni.
- Akitsuut annertunerutillugu qularnanngitsumik takornariat Kalaallit Nunaannut angalasut ikilissapput, Mike Rinno Kruse, World of Greenlandimi pisortaq oqarpoq.
AAMMA ATUARUK Akitsuutikinnerulerneq Danmarkimut billetinik akikinnerulersitsissasoq
Nunatsinniit Nunatsinnullu angalasussat billitsiisa akii akitsuuserlugit mittarfiit heliportillu amigartoorfiusut matussuserniarneqarput. Nunattali sinnerani timmisartuussinerit qanoq amerlatigineri aallaaviullutik amigartoorut nikerartussaavoq.
Naalakkersuisut siunnersuumminni naatsorsuutigaat takornariat Nunatsinnukartut amerliartornerat aallaavigalugu akitsuut appariartussasoq.
Air Greenlandillu nunap sinnera takornariaqarnerulissappat tamaattoqarsinnaanera ilumoorsinnaasoraa.
-Nunatsinnut tikittut nunatta sinneranut angalassappata taava eqqorsimassaaq. Taamaattoqassanersorlu maannangaaq oqaatigiuminaappoq, Jacob Nitter Sørensen, Air Greenlandimi pisortaagallartoq KNR-imut oqarpoq.
AAMMA ATUARUK Jacob Nitter Sørensen Air Greenlandimi pisortaaninngorpoq
Nunanit tamalaanit angalasut akitsuusersorneqarnissaat pillugu Naalakkersuisoq Erik Jensen oqaaseqarusunngikkallarpoq.
AAMMA ATUARUK Mittarfiit nutaat angallanneq akisunerulersissinnaagaat