Jacob Nitter Sørensen Air Greenlandimi pisortaaninngorpoq
Jacob Nitter Sørensen qaammatini qulingiluani pisortaagallartutut sulereersorlu siulersuisut pisortaanertut atorfinitsissallugu aalajangiuppaat.
- Piffissap ingerlanerani arlalinnik unammilligassaqartarsimavoq, kisiannili Jacobip akisussaaffini tamakkiisumik naammassisarsimavai ingerlatseqatigiiffimmilu ingerlatsinermut ineriartornermullu sunniuteqartarsimalluni, Siulersuisuni siulittaasoq Søren Lennert Mortensen oqarpoq nangillunilu:
- Air Greenland attaveqaatinut nutaanut piareersarnermut atatillugu annertuumik allanngortiterisussaavoq, siulersuisullu isumaqatigiipput, Jacob ingerlatseqatigiiffimmi allanngortitsiartornerni aqutsisussatut eqqortuusoq.
Timmisartortitseqatigiiffik Jacob Nitter Sørensenip nalunngillualersimavaa.
Taassuma 2000-imi pilotitut ilinniakkani naammagamiuk kingorna Air Greenlandimi atorfeqarsimalluni. Timmisartortartunut pisortaagaluarpoq, tassani timmisartunik sullissinerit timmisartunilu sulisut akisussaaffigisimallugit. Taassuma saniatigut pilotinut pisortaasimavoq Dash 8-milu aquttuusimalluni, kiisalu training manageritut atorfeqarsimalluni.
Jacob Nitter Sørensen maanna Air Transport Managementitut City Universitetimi Londonimiittumi septembarip tungaanut ilinniarpoq.
Pisortaaninngortitsinerup saniatigut pisortap tulliatut atorfinitsitsissallutik timmisartortitseqatigiiffiup aamma aalajangiuppaa.
- Air Greenlandimi unammilleqatigiinnermut nutaamut allannguinissap salliutilluinnarneqarnissaata qulakkeerneqarnissaa siunertarineqarpoq, siulersuisuni siulittaasoq Søren Lennert Mortensen naggasiivoq.