Floridami atuarfimmi aallaasertoqarnerani ikinnerpaamik 17-it toqutaasut

Nutaarsiassaqartitsivik Reuters naapertorlugu Broward Countyimi sheriffip, Scott Israelip, oqaatigaa ikinnerpaamik inuit 17-it toqutaasimasut.

Aallaasersortoqarnera illoqarfimmi Parklandimi, Miamip avannaatungaaniittumi, atuarfimmi Marjory Stoneman Douglas High Schoolimi pivoq.

Aallaasersortoq ikuallattoornermi kalerrisaarummik aallartitsisimasorineqarpoq, atuartullu ininit atuartitsiviusunit anialermata atuarfiup illutaata ilaani aalajangersimasumi eqqartoqarpoq.

Politiit aallasersortuusorineqartoq tigusarisimanerarpaat. Reutersilu naapertorlugu tassaavoq atuarfimmi atuartuusimasoq 19-inik ukioqartoq.

Taanna eqqunngitsumik pissusilersorsimanini pissutigalugu atuarfimmit anisitaasimasoq Scott Israelip oqaatigaa. Sheriffip aamma oqaatigaa 19-inik ukiulik aallaasersornermini ikinnerpaamik qoorortooq ataaseq magasinallu arlalissuit atorsimagai.

Aallaaserortuusorineqartoq illoqarfimmi Coral Springsimi tigusarineqarpoq. Atuarfimmi aallaasersortoqarneranit nalunaaquttap akunnerata ataaseq qaangiuttoq tamanna pivoq.

USA-mi atuarfinni aallaasersornerit ukiup aallartinneraniilli 18-issaraat.

Aviisi Sun Sentinel naapertorlugu atuarfik 3000-it missaannik atuartoqarpoq, 9. klassimit 12. klassimut atuartut.