Tarnip pissusiinik ilisimatuut amerlanerusut pisariaqartinneqartut

Sapaatip akunnerata ataatsip ingerlanerani marlunnik imminortoqareersoq toqutsisoqareersorlu taama oqarpoq Tasiilameersoq Justus Hansen, Demokraatit.

Pisimasut alianartut pissutigalugit tarnip pissusiinik ilisimatuut isumaginninnermullu siunnersortit sapaatip akunnera kingulleq Tasiilamiissimapput.

Politikeri Tasiilami najugalik Justus Hansen naapertorlugu ulluinnarni tarnip pissusiinik ilisimatuut marluk illoqarfimmi najugaqassagaluarput. Maannakkulli taamaattoqanngilaq.

- Soorunami maani kommunip allaffiani isumaginninnikkut sulisunut pisut ulluinnarni assut sunniuteqartarput, sulisummi aamma ikippallaarput.  Imminut toqunnerup qanoq pinaveersaartinneqarsinnaanera allallu pillugit aamma innuttaasunit saaffigineqartaqaat.

AAMMA ATUARUK Tasiilami alianartumik pisoqarnerata kingorna ikumatitalerluni ingerlaaqatigiittoqarpoq

Kommuneqarfik Sermersooq ukiuni kingullerni arlaleriarluni Tasiilami tarnip pissusiinik ilisimatuumik atorfinitsiniarsimagaluarpoq, qinnuteqartoqartarsimannginnerali Justus Hansenip paasisinnaavaa.

- Imaassinnaavoq illoqafitta tusaamanerlutaanera pissutaasoq, suliassatigummi kinguaattooqqasupilussuuvugut. Tarnip pissusiinik ilisimatuumut ataatsimut artornarpasissaaq, tamannalu paasilluarsinnaavara.

Taarsiullugu Kommuneqarfik Sermersuup ikinnerpaamik atorfiit marluk inuttassarsiuuttariaqarpai, tarnip pissusiinik ilisimatuut imminnut ikorfartortarniassammata, taanna isumaqarpoq.

AAMMA ATUARUK Kriseberedskab i Tasiilaq får ekstra hjælp fra Nuuk

Namminersorlutik Oqartussat angalaqatigiittartui aamma akulikinnerusunik tikittariaqaraluartut Justus Hansen isumaqarpoq.

- Pisoqareertinnagu maanngartoqarneq ajorpoq, pisoqareeraangat aatsaat ikiuiartortoqartarpoq. Isumaqarpunga kommuni peqatigalugu suleriaasiliortoqartariaqartoq ukiumut marluk/pingasoriarluniluunniit tikittalersillugit, suliassanik ikilisaallutik suliassallu ataasiakkaat sukumiisumik suliaralugit.-
Tarnip pissusiinik ilisimatuut atorfinitsinneqarnissaat pillugu kommunalbestyrelsimut siunnersuuteqarsimanani Justus Hansenip nassuerutigaa.

Tarnilli pissusiinik ilisimatuut peqatigiiffiata siulittaasuanit taperserneqarpoq, tamannalu kingusinnerusukkut sammiumaarparput.