Aalisakkat, akileraarutit ataatsimiititaliarsuarlu partiinik minnernik periarfissiivoq

Partiit sisamanit ikinnerunngitsut 16-inillu ilaasortaatitaqartut Nalakkersuisoqatigiinnissaat ilimanarsivoq. Apeqqutinik qitiusunik isumaqatigiinngissuteqarnerup partiit angisuut, IA Demokraatillu utaqqiinnartussanngortissimappasippaat.

Naalakkersuisoqatigiilertoqarsinnaasoq, Kim Kielsen tallimanngornermi ullaakkut oqaatigimisaarpaa. Demokraatit isumaqatigiinniarnernit pingasunngornermi unipput Siumullu Inuit Ataqatigiinnik isumaqatigiinniarnini sisamanngornermi unitsippai.

Taava Siumup siulittaasua Kim Kielsen KNR-imut oqaluttuarpoq, partiimi taavalu Partii Naleqqap, Atassutip aamma Nunatta Qitornaasa naalakkersuisoqatigiinnisssamik isumaqatigiinniarnerat pillugu nalunaaruteqarnissaq qanilliartortoq sisamanngornermi ullaakkut oqaatigaa.

Partiit taakkua katillutik 16-erluinnarnik ilasortaatitaqarlutik, Inatsisartuni amerlanerussuteqarput.

Partiit sisamat naalakkersuisoqatigiinnissamik isumaqatigiissutissaata imaa suli tusanngilarput, kisianni Inuit Ataqatigiit Demokraatillu Siumumik suut isumaqatigiinngissutiginerlugit isertuutinngilaat.

Inuit Ataqatigiit siulittaasuat Sara Olsvig naapertorlugu aalisarneq pillugu inatsisissaq avissaarutaavoq. IA-p isumaqatigiinniarnermi piumasaqaataasa ilagaat, aalisarneq pillugu inatsisissami nutaami, IA-p siunnersuutaa, qineqqusaarnermilu saqqummiussaa aallaavigineqassasoq.

Tassani aalisagartassiissutit qaqugukkut utertinneqartarnissaannik apeqqut taavalu aamma   sinerissamut qanittumi aalisarnerup attanneqarsinaasuunissaanik kissaat, siunnersuummit alisarnermut naalakkersuisup Siumumeersup Karl Kristian Krusep ukiakkut ataatsimiinnermi saqqummiussaanit allaanerupput. Siunnersuut taanna Siumup pissaanermik tigumminniinnassaguni saqqummiuteqqissallugu, qineqqusaanermi neriorsuutigaa.

Demokraatit qiviaraanni, init akileraarutaannik appaarusunneq Tunngaviusumillu inatsisiliornissamut ataatsimiititaliamik atorunnaarsitsinissaq isumaqatigineqanngimmat, isumaqatigiinniarnerit unipput.

Partiit sisamat suut isumaqatigiissutigisinnaaneraat qiviaraanni, aalisarneq pillugu inatsisissatut siunnersuut, ukiakkut ataatsimiinnermi saqqummiunneqartoq, Siumup aamma Partii Naleqqap illersugarigaat ersareqaaq. Mikinerusunik angallateqarlutik aalisartut siunissaannut ernumaneq partiit taakkua katersuussutigisimagunarpaat.

Siunnersuutip taasuma nunatta karsianut annaasaqaataanissaanik naliliinerit aalisartitseqatigiiffissuillu miliardilinnik taarsiiffineqarneqarnissamit ilimasaarutaannik,  Partii Naleraq aamma Siumut qineqqusaarnermi apeqqusiisarput.

Taava naminersulernissamut suliat sukkatsisinneqarnissannut oqaluttoqalersinnaassaaq. Partii Naleqqap aamma Nunatta Qitornaasa namminersulernissaq qineqqusaarnermi ukkataraat. Illuanilu Siumup siulittaasua, Kim Kielsen, uatsilaaqqusivoq, oqarluni, assersuutigalugu ilinniagaqassuseq qaaffassasoqqaartariaqartoq, inuiaqatigiinnilu sanngiinnertat pilliutigalugit namminersulissanngitsugut.

AAMMA ATUARUK Amerlanerussuteqaqqalaarluni Naalakkersuisoqatigiiliorniarluni sulivoq

AAMMA ATUARUK Kielsenip IA utaqqivaa - aalisarnermut tunngasut apeqquterujussuupput

AAMMA ATUARUK Demokraatit naalakkersuisunngortitsiniarnermut isumaqatigiinniarnernit tunuartut