Facebookikkut qinngasaarineq atuarfik ikiortigalugu unitsinneqarpoq

Qinngasaarisarnerup unitsinneqarnissaanut atuarfik pingaaruteqartumik inissisimasoq, Meeqqat Illersuisuat isumaqarpoq, qinngasaarisarnerullu aaqqissuussaanerusumik akiorniarneqarnisaa ujartorpaa.

Niviarsiaqqap ataataa panimmi atuarneranut malinnaalluarpoq. Tamanna pillugu atuaqataata nukappiaqqap ataataarussimasup niviarsiaqqamut qinngasaarutigaa.

Niviarsiaqqap nukappiaraq ataataarussimaneranik qinngasaarpaa.
Nukappiaraq ajuallalluni qarasaasiakkut attaveqatigittarfikkut Facebookikkut niviarsiaraq qinngasaarpaa, atia assingalu ilanngullugit.

Niviarsiaqqap qinngasaarneqarnera inunnit amerlasuunit peqataaffigineqalerpoq.

- Imatut kinguneqarpoq sinerissamit aamma Danmarkimit inuusuttuaqqat paninnit nukarliit aamma angajullit qinngasaarutinik allattaqattaalerlutik, Ninna Esrassen taama oqarpoq.

Nunatsinni meeqqat atuarfiini qarasaasiakkut attaveqarfinni qinngasaarisarnerup atugaanera pillugu ilisimatuussutsikkut suliffeqarfiup HBSC-ip misisuiffigaa.

Qarasaassiakkut attaveqatigiittarfinni meeqqat qinngasaarisarnerisa atugaanerujussuat atuartut qinngasaarisarnerannik misisuisup tupaallaatigaa.

Aamma atuaruk Meeqqat qinngasaarisarnerat atugaasorujussuuvoq

Ninna Esrassenip paniata Facebookiatigut ajuallannartunik allaffigineqartarnera paasiva, tamatumalu kingorna atuarfimmut saaffiginniluni.

- Atuarfimmi naapeqatigiippugut atuarfiup pisortaa peqatigalugu saammaateqatigiinnissaq anguniarlugu, pisuutitassarsiornata, qinngasaarineq sakkortuallaaqimmat, Ninna Esrassen oqarpoq.

Facebookikkut allaqataanerit sakortuut atuarfik suleqatigalugu unitsinneqarput.
Meeqqat illersuisuata Aviâja Egede Lyngep ilisimavaa atuarfinni qinngasaarisarneq pinaveersaartinniarlugu atuarfinni suliuniuteqartoqartartoq.

- Atuarfiit ilaasa qinngasaarisarneq eqqumaffigereeraat nalunngilara  ajornartorsiullu taanna pillugu takussitissaalluarsinnaavoq atuarfinnut allanut, Meeqqat Illersuisuat taama oqarpoq.

Ilanngullugulu oqaatigaa, atuarfiit misilittagaqarluartut atuarfinnut allanut ajornartorsiut pillugu maligassiulluiarsinnaasut.

Kisianni qinngasaarisarneq pillugu atuarfiit iliuuseqartarnerat assigiinngippallaarpoq taamaattumik qinngasaaarisarnerup pinaveersaartinneqarnissannut aaqqissuussaanerusumik suliniutigineqarnissaa Meeqqat Illersuisuata ujartorpaa.

- Nalunngilara atuarfiit ilaasa eqqummaariffisaraat, kisianni aaqqissuussamik nunatsinni toqqaannartumik atuarfinni taamatut politikkeqarneranik ilisimasaqanngilagut, Aviâja Egede Lynge taama oqarpoq, erseqqissaatigalugulu qinngasaarisarnerup pinaveersaartinneqarnissaannut nunani allanni misilittagaqarfigineqarluartoq.

Aamma atuaruk Meeqqat qarasaasianik atuisarnerat misissuiffigineqalersoq

Ninna Esrassenip Aviaja Egede Lynge isumaqatigaa, erseqqissaatigalugulu meeqqat qinngasaarinnginnissannut angajoqqaat annertuumik akissussaaffeqarmata.

Taamaattorli angajoqqaat tamarmik akisussaaffimmik tigusisinnaannginerat oqaatigaa.

- Kisianni aamma angajoqqaaqarpoq tamakku tungaatigut ilisimasaqartillu nukissaqanngitsut, Ninna Esrassen oqarpoq.