Kulturi

Meeqqat qarasaasianik atuisarnerat misissuiffigineqalersoq

Qarasaasiakkut attaveqatigiittarfinni meeraqatinik ajattuisarneq qinngasaaruttarnerillu atugaanerat annertuvoq, tamanna Meeqqat Isummmersortarfianit MIO-mit oqaatigineqarpoq.

En ting er, hvad børn gør, når de er sammen, en anden er, hvad de gør foran computer og mobil.

Allattoq Jaaku Lyberth

novembarip 13-at 2014 04:54

Taamaattumik meeqqat qarasaasianik atuisarnerannik misissuineq siulleq MIO-mit aallartinneqarpoq.

Meeqqat atuarfiini 6. aamma 7. klasseni atuartut nunarput tamakkerlugu apeqqutinik akisassaminnik ulluni makkunani nassinneqarput, ilaatigut qarasaasiakkut attaveqatigiittarfinni ajattorneqartarnersut imaluunniit inersimasunit eqqunngitsuliorfigineqartarnersut.

Aamma atuaruk MIOp Meeqqat Pisinnaatitaaffii IlinniartitsissutigivaiSMS atorlugu meeqqanut siunnersuisarfimmi

Taanna ullut tamaasa allaffigineqarsinnaasumi ilisimavarput, nunarput tamakkerlugu meeqqat meeraqatiminnit ajattorneqarlutik qinngasaarneqartartut atugaasorujussuusoq. Katrine Kratholm Rasmussen Meeqqat isummersortarfianni MIO-mi fuldmægtigeq misissuisitsinermillu suliaqartoq taama oqarpoq.

Apeqqutit akineqartussat atuarfinnut nassiunneqarput taakkua atuartut ilinniartitsutik angajoqqaatillu peqatigalugit allattorneqassapput.

Meeqqat qarasaasiap saavanut pigaangamik sulerisarnersut aamma kikkunnik allaqateqartarnersut paasiniarneqassalluni.

Misissuinitsinni soqutigisaraarput paassissallugu, meeqqat atuarnerminni imaluunniit aniatsiarnerminni imaluunniit qarasaasiakkut allaqatigiittarnermi - allanit takuneqarsinnaanngitsumik ajattuisoqartarnersoq qinngasaarisoqartarnersorluunniit, Katrine Kratholm Rasmussen oqarpoq.

Aamma atuaruk Meeqqat pisinnaatitaaffii MIO-p app-ikkut saqqummersippai

Qarasaasiat atorlugit allaqatigiittoqarnermi ajattuisarneq qinngasaarisarnerlu ilinniartitsisunit angajoqqaanit inersimasuniillu takuneqarsinnaasanngilaq taamaattumik misissuinitsinni paaserusupparput meeqqat kisimiitillutik qarasaasiap saavani aamma taama pineqartarnersut.

Qarasaasiakkut attaveqatigiittarfiit periarfissarpassuarnik ammaassisarput, tassuuna meeqqat inersimasunik attavigineqarsinnaasarput eqqunngitsuliorfigineqarlutillu, tamannalu aamma misissuinermi akissutissarsiniarneqarpoq.
Taamaattumik paaserusupparput meeqqat inersimasunit assinik filmilianilluunniit nakuusertunik kinguaassiuutitigulluunniit atuisunik nassinneqartarnersut aamma meeqqat inersimasunit ilisarisimanngisaminnit attavigineqartarnersut, Katrine Kraholm Rasmussen MIO-meersoq oqarpoq.

Taassuma ilanngullugu oqaluttuaraa meeqqat inersimasunit nalusaminnit attavigineqartarnerat pillugu Danmarkimi meeqqat suliniaqatigiiffiata Red Barnetip misissuissimaneranit paasineqarmat tamassuma ajornartorsiutaanera annertusiartortoq.
Misissuinermi anguniarneqarpoq meeqqat internetimik atuineranni qanoq illersorneqarsinnaasut, Katrine Kratholm Rasmussen oqarpoq.