Meeqqat pisinnaatitaaffii MIO-p app-ikkut saqqummersippai

MIO-p meeqqat pisinnaatitaaffii pillugit App-imik, tassa programmi qarasaasiatigut alakkarneqarsinnaasunngorlugu suliaq, sapaatip-akunnerata massuma ingerlanerani saqqummersissavaa. Meeqqat pisinnaatitaaffitik iPadit smartphonesillu atorlugit nuannersumik ajornaatsumillu ilinniarsinnaalissavaat. MIO tusagassiuutinut nalunaarummi taama allaaserisaqarpoq.
Allattoq Mads Lynge
apriilip 04-at 2014 12:47

Meeqqat pisinnaatitaaffitik pillugit atortorissaarutit namminneerlutik nuannarisatik paasissutissanik ujarlersinnaanissaminnut periarfissaqalernerat, Meeqqat Illersuisuata, Aaja Chemnitz Larsenip, nuannaarutigaa:

- Kommunit arlallit meeqqat atuarfianni meeqqerivinnilu atugassanik iPadinik agguaanerannut atatillugu meeqqat pisinnaatitaaffii pillugit app-iliornissaq isumassarsiaraarput. App-it kalaallisut ajoraluartumik amerlanngillat, taamaattumillu isumaqarpugut, meeqqat pisinnaatitaaffii pillugit app-i atuartitsinermi atorneqarsinnaasoq, soorlu assersuutigalugu inuttut ineriartornermi, sanassallugu isumassarsiatsialaasoq, Aaja Chemnitz Larsen, oqarpoq.

App-i kalaallisuujullunilu danskisuujuvoq, taassumallu imaasa ilagaat Naalagaafiit Peqatigiit Meeqqat Pisinnaatitaaffii pillugit Isumaqatigiissutaat meeqqanut naleqqussagaq. Meeqqat Nunatsinni  nunanilu allani sumi ikiortissarsiorsinnaanerlutik takusinnaavaat, pisinnaatitaaffitik unioqqutinneqarpata imaluunniit ikiorneqarnissaminnik pisariaqartitsigunik. Meeqqat qanoq ilillutik MIO sms-ikkut siunnersuisarfia 1899 attavigisinnaaneraat assersuutigineqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq