EU-p nunatsinni allaffiani pisortaasussaq aana

EU-p Nuummi allaffittaareqqammisaa nutaamik sulisortaarpoq.

Simon Bojsen-Møller allaffimmi nutaami pisortanngorpoq, atuuffillu taanna qilanaaralugu tusagassiuutinut nalunaarummi oqaatigaa.

- Kalaallit Nunaat EU-lu ukiorpassuarni qanimut suleqatigiinnikuupput, pingaartumik aalisarnermi ilinniartitaanermilu, Nuummilu allaffimmik nutaamik ammaanikkut pingaartumik mingutsitsinnginnerunissamut, nukissiuutinut silap pissusianut, avatangiisinut aatsitassanullu tunngatillugu suleqatigiinnermik suli annertusaanissamut maanna piareerput, taanna oqarpoq.

Simon Bojsen-Møller EU-mi aatsaat suliaqanngilaq. Taanna nunanut allanut tunngasunik suliaqareersimavoq, aamma naalakkersuisoqarfiit, inuussutissarsiuteqarneq innuttaasullu akornanni atassutaanermik suliaqarnermik ilisimasaqarluni. Kingullermillu taama Kangia Qiterlermi suliaqarpoq.

- EU-mi nunarsuarmi sunniuteqangaatsiarluni tunniussaqangaatsiarsinnaavoq, taamaammat Kalaallit Nunaanni angalanissannut illugiinnullu iluaqutaasumik attaveqatigiinnernik nutaanik pilersitseqataanissannut qilanaarpunga, Simon Bojsen-Møller oqarpoq.

Simon Bojsen-Møllerip pisortanngornerani EU-p Nuummi allaffiani Europakommissionip siulittaasuanit, Ursula von der Leyenimit, Danmarkip ministeriuneranit, Mette Frederiksenimit, Naalakkersuisullu siulittaasuannit, Múte B. Egedemit marsimi ammarneqartumi sulisut maanna marluulerput.