EU-p issittoq pillugu politikkissaani Kalaallit Nunaat sunniuteqarsinnaavoq
- Tusaasakka najoqqutaralugit, Kalaallit Nunaat EU-mut pingaaruteqartorujussuuvoq. Taamaammat isumaqarpunga, Kalaallit Nunaat pissarsilluarniarsarisariaqartoq. Kalaallit Nunaammi nunanut allanut attaveqaqatai qimerloorutsigit Kalaallit Nunaat pissarsilluarsinnaaqaaq, aamma EU-mut suleqatigiinnerulernissaq eqqarsaatigalugu, Damien Degeorges oqarpoq.
EU-p Issittoq pillugu politikkissap inerisarnissaa ukiup naanerani naammassissasoq ilimagaat.
Taannalu sulissutiginerani soqutigisallit oqaloqatigisaqattaarpai.
Finlandimi Sverigemilu suleqatigiinnik EU aaqqissuivoq, Islandimilu suleqatigiinnik qaammatillu ingerlanerani aaqqissuisoqassaaq.
Aamma atuaruk ICC Bruxellesimi tapersersorneqarluartoq
EU-llu politikkissamik pilersitsiniarneranut atatillugu Nunatta aningaasanik pissarsisinnaassasoq, Damien Degeorge isumaqarpoq.
- Aningaasaliinissanut aningaasaliussat amerlanerulissasoraakka. EU-p issittoq pillugu sammisaqarnerulerniarneranut tamanna aamma sunniuteqassaaq. Tamannalu pingaaruteqarpoq, Degeorges oqarpoq.
Nunattalu sunniuteqarluarsinnaanera piviusorsiortoq, Damien Degeorge isumaqarpoq.
- EU-p politikkiliorneranut Kalaallit Nunaat sunniuteqarluarsinnaasoq piviusorsiortuuvoq. EU-mmi Kalaallit Nunaat suleqatitut pingaartutut isigaa. Kalaallit Nunaat aamma EU-p nunasiaatigisimasaanut niuernikkut suleqatigiiffiuvoq, EU-mullu attaveqarluareerluni. Taamaammat EU-p Artic Policyliorneranut Kalaallit Nunaat sunneeqataassasoq pissusissamisoorpoq, Damien Degeorges oqarpoq.