Vittus: EU-mut ilaasortanngornissaq pillugu misissuinissamut siunnersuut itigartinneqarpoq
Nunatta EU-mut ilaasortanngornissaa nalilersorsinnaajumallugu, tassani ilaasortaanerup pitsaaqutai puitsaanngequtaaalu ersarissarneqassasut, Demokratineersup Justus Hansenip kissaatigaa.
Taamaammat Naalakkersuisut nunatta EU-mi ilaasortaasinnaanerani kingusinnerpaamik 2018-imi ukiakkut ataatsimiinnissamut misissuereersimassasut, taanna Inatsisartunut siunnersuuteqarpoq.
Siunnersuulli nunanut allanut tunngasunut naalakkersuisumit, Vittus Qujaukitsumit itigartitassanngortinneqarpoq. Ilaatigut Tuluit Nunaata EU-miit aninera peqqutigalugu nunat peqatigiit allanngorujussuartussaanerat innersuussutigaaa.
Nunarput 1982-imi taasinerup kingorna taamani EF-iusumut ilaasortaajunaarpoq, nunarpullu maanna OLT-tut, tassa nunatut imartat akianniittutut aamma nunap ilaatut inissisimavoq.
Qeqertat katillutik 22-it nunatsitut inissisimapput, taaakkunannga qulingiluat tulunnut atallutik. Qeqertat taakkua qulingiluat aaqqissuussinermut ilaajunaarpata, OLT-mik aaqqissuussineq allanngorsinnaasoq, Vittus Qujaukitsup ilimagereersinnaavaa.
- EU-mi politikkikkut aningaasarsiornikkullu pissutsit tuluit ilaasortaajunnaarnerata malitsigisaanik ukiualuit qaangiuppata ima allanngortigisimassapput, 2018-imi naliliinermi inerniliunneqarumaartussat, kingunitsianngua qanganitseriissallutik, Qujaukitsoq akissuteqaammini allappoq.
Tamanna tunuliaqutigalugu misissuinissaq, Justus Hansenip missingiinera naapertorlugu koruuninik 1,5 aamma 2 millionit akornanniittunik akeqarumaartoq, aningaasanik atuilussinnaanerussasoq, Vittus Qujaukisoq inerniliivoq,
Siunnersuut Inatsisartuni partiinit allanit isummerfigineqarluni marlunngornermi siullermeerlugu suliarineqassaaq.