EU-mi eqqartuussut taarsiivigineqarsinnaanermut pisinnaatitaaffiliisoq

Taarsiivigineqarnissamut pisinnaatitaanermut EU-mi malittarisassat atuuttut malillugit EU-p avataanut mikkallarnikkut kinguaattoornermi aamma atuuppput.

- Timmisartuni arlalinni ilaasussaatilluni angalanerit ataatsimut inniminnikkat ataatsimut angalanertut ataqatigiittussatut isigineqassapput, mikkallarnermi timmisartumut allamut nuuttarnerit tamanna allanngortissanngilaat, EU-mi Eqqartuussiviit oqarput.

Arnaq tyskiusoq Casablancamut mikkallarnermini nalunaaquttap akunnerinik sisamanik kinguaattoortinneqarluni taarsiivigineqarniartoq eqqartuussiviit taperserpaat.

Eqqartuussummut isumminngitsut

Marokkomiut timmisartuutileqatigiiffiata piumasaqaat aallaqqaammut itigartitsissutigigaluarpaa, angalanissamulli inniminnikkat ataatsimut pisiarineqarsimappata taava EU-mi malittarisassat atuutissasut, EU-mi Eqqartuussiviit maanna aalajangerpaat

Air Greenlandip eqqartuussummi aalajangiineq iliuuseqarfiginiarneraa timmisartumullu ilaasartuminnut ilitsersuumminnik allannguiniarnersoq paasiniarlugu, KNR-ip Air Greenland attavigaa. Suliffeqarfiup pissutsit malinnaaffigalugit mailikkut akissutigaa.

- Nutaamilli iliuuseqartariaqarutta, timmisartuutileqatigiiffittut Angallannermut, Sanaartornermut Ineqarnermullu Aqutsisoqarfik kiisalu EU-mi peqqussutit naapertorlugit pisussaatitaaffigut iliuuseqarfigissavagut. Eqqartuussivimmili suliamut ataatsimut tunngatillugu isumminngilagut, Air Greenlandimi sullitanut pisortaq, Helle Pedersen KNR-imut allappoq.

Timmisartumik angalasunut taarsiissuteqarnissamut EU-p malittarisassai EU-p avataanut angalanernut atuutinngillat.