Erniartorluni aallartariaqartoq: Annilaangavunga akerliusorujussuullungalu
Nunatsinni ernisussat aallartariaqartarput.
Nunatsinni ernisussiortut peqatigiiffiat naapertorlugu naartusut ukiumut 40-nit 45-t procentiinut erniartorlutik aallartariaqartarput.
32-nik ukiulik, Ane Mette Løvstrøm Uummannameersoq taakkununnga ilaavoq.
AAMMA ATUARUK Ernisussiortut peqatigiiffiata Aasiaat ernisarfiujunnaavissinaanera ernumanarteqaat
Taassuma erniffissaa aasamut killeqarpoq, taassumalu angerlarsimaffini ilaquttanilu qimallugit erniartornissani toqqissisimaffiginngilaa.
- Toqqissisimanngilanga nunagisanni ernisinnaannginnama, taavalu oqarfigineqarnikuuvunga erniartorninni kisimiissasunga ilaquttakka ilaginagit. Ilaginiarukkit tusarpara ullormut 357 inummut ataatsimut koruuneqartassasoq. Toqqissimanarinngilara nunagisaq qimallugu erniartortarneq,
Kalaallit Nunaanni peqqinnissaqarfik sumiiffinni tallimaasuni ernisarfeqarpoq
Nuna tamakkerlugu nakorsiartarfik Dronning Ingrids Hospital
Nunap immikkoortuini napparsimmavik Ilulissat
Nunap immikkoortuini napparsimmavik Sisimiut
Nunap immikkoortuini napparsimmavik Tasiilaq
Nunap immikkoortuini napparsimmavik Qaqortoq
Taanna naartunermini ernisussiortumik ataasiarluni misissortippoq, Uummannamilu ernisarfik 2017-imi matunikuummat ernivissaa qaninneq Ilulissaniippoq.
- Ilaquttat qimallugit erniartornissaq misigissutsinut sunniuteqangaatsiarsinnaavoq. Siullermik maani ernisoqartarallarmat taama aalassaqqatiginikuungilanga. Massakkut eqqaaginnarlugu erniartornissaq nangiartutut qamuuna aalassattarpunga,
Ernisoqartarnera qineqqusaarutigineqartariaqartoq
Ane Mette Løvstrøm erninissaminut illoqarfigisamiiginnarusunngaarami Uummannamiiginnarnissani isumaliutigivaa. Maannalu allakkamik ernisussiortut peqatigiiffianut nassiussaqarluni.
- Taassuma imaraa misigissutisinut qanoq aalassaqqanartiginersoq, taavalu imminut akilersinnaanginnersoq, nalunngisakka malillugit inuit sisamaavugut maani massakkut naartusut. Taakku oqaatigerusunnarput isiginiarniartariaqartullu ilumut ernisussat imaluunniit naartusut eqqugaanerat imaluunniit misigissusaat.
Ernisarfiit matuneqartut
Ernisarfik matuneqartoq kingulleq Aasianniippoq.
Piumasaqaatinut naammassinnissinnaasunik sulisussaqannginnerat pissutaalluni 2019-mi matuvoq. Matusigallarnerusoq nalunaarutigineqarpoq.
Aningaasanut inatsimmi kingullermi ammaasoqaqqinnissaata sulissutisineqarnissaa suliarineqartoq allassimavoq.
Uummannami ernisarfik 2017-imi matuvoq.
Maniitsumi 2012-imi ernisarfeqarunnaarpoq.
Iliuuseqartoqartariaqartoq, Ane Mette Løvstrøm isumaqarpoq.
- Isumaqarpunga tamanna isiginiarnerusariaqaraat nunatsinni peqqinnissaqarfiup naalakkersuisullu - qanoruna aalaakkaattumik siuarsaasoqarnissaa illoqarfimmi. Taavalu eqqaamasakka malillugit qineqqusaartoqarnikuugami 'meeqqiorniaritsi' taama nipilimmik taavalu killormoortumik, meeqqeriviliortoqarpoq maani Uummannami, kisianni naapertuunnani illuatungaa ernisoqarsinnaajunnaartillugu illoqarfigisami, taanna oqarpoq, nangillunilu:
- Qanoq qujanartigissagaluarpa siullertut tamakkua aaqqissorneqaraluarpata, naartusut aamma allat eqqarsaatigalugit. Kisimiinngilanga taama inissisimasoq. Isumaqarpunga qinersinerup nalaani annerusumik tamanna eqqarsaatigineqartariaqartoq nunatta avannarparsinnerusortaani qanoq atugassaqartinneqartugut
Ernisussat ernisoqarnissaanut piareersimasoqarfiunngitsumi, assersuutigalugu Uummannami ernerusuttut illoqarfigisaminniiginnarlutik ernisoqarnissaanut piareersimatitsiviunngitsumiiginnarnissaq aarlerinartoqarfiusoq paasissutissiissutigineqarsimasoq paasisimallugu allagaq uppernarsaat atsiortussaagaat ernisussiortut peqatigiiffiata KNR-imut paasissutissiissutigaa.
Erninermi aarlerinartut tassaasinnaapput aanaartoqalersinnaanera imaluunniit pinasuartumik pilatsinnikkut ernisoqarnissaa.