Erngup nukinganik nukissiutit tamatta pigaavut
Sulinermik inuussutissarsiuteqartut kattuffiat SIK piumasaqarpoq assigiimmik akeqartitsineq atulerseqqinneqartariaqartoq. Tamanna ilaatigut pivoq paasinarsimmat erngup nukinganik innaallagissiorfiliorneq sanaartorfiusuni najugallit kisimik akilertussanngoraat.
Nukissiorfiit sanaartortullu suliffeqarfiata aaqqiagiinnginnerat pissutigalugu immikkut 300 millioner koruuninik akiliisariaqalernermik kinguneqarsinnaavoq, taamalu pisoqassappat akiliisussat tassaapput Qaqortumi Narsamilu atuisut.
Inuit Ataqatigiit sinnerlugit Inatsisartuni ilaasortaaq Naaja Nathanielsen akerliuvoq akiligassap Qaqortormiunut Narsarmiunullu ingerlateqqilersaarneqarneranut.
SIK qissimigaarneruaa assigiimmik akeqartitsinerup atorunnaarsimanera. Sulisartut kattuffiata siulittaasua isumaqarpoq erngup nukinganik innaallagissiorfinnik sanaartorneq inuiaqatigiit tamarmiusut akilertariaqaraat.
- Nukissiorfiit inuiaqatigiit pigimmatigit aningaasartuutit inuiaqatigiit nammaqatigiillutik akileeqataaffigisariaqarpaat, Jess G. Berthelsen oqarpoq.
Taanna isumaqarpoq IAp tungaaniit oqarluartaarnerinnaasoq inuiaqatigiit nammaqatigiilluni ineriartortinneqartut.
- Pissanganarpoq Inuit Ataqatigiit nammaqatigiilluni assigiinnerusumik maani nunami ineriartornissaq ilumoorunneraat, sapiissuseqarlutillu nammaqatigiinnerup uterteqqinneqarnissaanik siunnersuuteqassanersut, Jess G. Berthelsen oqarpoq.
