Siumup siulittaasuata, Erik Jensenip USA-p nunattalu akornanni pissutsit sukkasuumik ineriartornerarpai, sammivigisaalu naatsorsuutigisimannginnerarlugu.

Amerikamimi præsidentinngortussap, Donald Trumpip soqutiginninnera piffissami kingullermi annertunerulingaatsiarpoq.

- Soorunami tupaallannarpoq taama inuk imaanaangitsigisoq taama qanitsigileriataarnera tamatsinnut tupaallannartutut oqaatigineqarsinnaavoq, Erik Jensen oqarpoq.

Ilisimasatsitut Erik Jensenip Donald Trump nunatsinnut decembarip naanerani qaaqquaa.

Kingunitsiannguagullu Donald Trumpip ernera Nuummukariasaarpoq. Ullorlu taanna Donald Trumpip nunatta aqulernissaanut sakkutuut aningaasallu atorlugit iliuuseqarsinnaanerluni aperineqarami angernanilu naamiinngilaq.

Danmarkimi nunat tamalaani nunatsinnilu ernumasoqarnera Erik Jensenip paasisinnaalluarnerarpaa.

- Soorunami oqaaseqaatigineqartut ernumaammernermik pilersitsivigineqarnerat taanna tupinnanngilaq inuiaqatigiinni aalassassutigineqarmat. Aamma uatsinniit soorunami tamanna imaannaangitsutut isumaqarfigineqartoq naluneqassanngilaq, aningaasaqarnermut naalakkersuisoq, Erik Jensen oqarpoq.

Eqqissisimassaagut

Uivertoqartariaqanngitsorli Siumup siulittaasua oqarpoq - Naalakkersuisullu siulittaasuat Múte B. Egede aamma taama oqaaseqarpoq.

- Eqqissilluta, toqqissilluta ingerlanissarput taanna pingaaruteqarpoq, aamma Naalakkersuisut taanna oqariartuutigaat, Erik Jensen oqarpoq.

Erik Jensenilli Trump suna pillugu oqaloqatigerusuppaa?

- Uanga aamma Aningaasaqarnermut Naalakkersuisutut soqutigisaraara nunatta atorneqarneranik, aammalu pisuussutitta atorneqarneranik annertusaanissaq. Taamaalilluta nunanit allanit tasiorneqartutut pinnata, kisiat nammineq oqaloqatiginnissinnaanissamik siunertaqarluta oqariartuuteqartarsimavugut.

Donald Trumpip ernera Donald Trump junior marlunngormat Nuummiippoq. Donald Trumpillu ernerminut inussiarnisaarneq inoqutinut attaveqaatitigut, Truth Socialikkut qujassuteqarfigaa.

"Takoqqiliivippugut" Trump nunatsinnut inuulluaqqusilluni allappoq.

Donald Trump ataasinngornermi januaarip 20-anni USA-mi præsidentitut ivertinneqassaaq. Præsidentinngortussap qaqugu nunatsinnut tikeraassanerluni inuulluaqqussummini allanngilaa.